Таниқли исломшунос олим Убайдулла Уватов вафот этди

Исломшунос олим, тарих фанлари доктори, профессор Убайдулла Уватов 80 ёшида вафот этди. Бу ҳақида Ўзбекистон мусулмонлари идораси хабар берди.

Олим Убайдулла Уватов фаолияти давомида Ўрта Осиёдан етишиб чиққан алломаларнинг ҳаёти ва илмий-маънавий меросини халқнинг маънавий мулкига айлантириш борасида салмоқли ишларни амалга оширган.

Унинг самарали меҳнатлари муносиб қадрланиб, 2017 йилда “Ўзбекистон Республикасида хизмат кўрсатган ёшлар мураббийси” фахрий унвони, "Меҳнат шуҳрати" ордени ва 2020 йилда “Фидокорона хизматлари учун” ордени билан тақдирланган.

Маълумот учун, Убайдулла Уватов 1940 йил 23 февралда Қашқадарё вилояти Ғузор туманида таваллуд топган. Тошкент Давлат Шарқшунослик институти, Президент Админстрацияси, Дин ишлари бўйича қўмита, Амир Темур, “Олтин мерос” жамғармалари, Имом Бухорий халқаро маркази, Имом Термизий халқаро илмий-тадқиқот маркази ва Халқаро ислом академиясида фаолият олиб борган.