“Ideal” iPhone tuzog‘i: Aldanmaslik uchun nima qilish kerak?

Bugun iPhone ko‘pchilik orasida keng tarqalgan va ommaviy gadjetga aylangan. Kimdir yangi modelni oladi, kimdir esa byudjetga mos variant sifatida ikkilamchi bozorni tanlaydi. Narxlar balandlashgani sabab, ishlatilgan iPhone’lar bozori juda faol.

Ammo ishlatilgan telefonlarning tashqi ko‘rinishi ideal bo‘lsa ham, ichida katta muammolar bo‘lishi mumkin. Shoshqaloqlik qilib olingan telefon keyin bosh og‘rigiga aylanishi hech gap emas. Shuning uchun sotib olishdan oldin bir nechta jihatlarni tekshirish juda muhim.

IMEIni tekshiring

Eng birinchi qadam — IMEI raqamini tekshirish. Bu orqali telefon yo‘qolgan yoki o‘g‘irlangan bo‘lsa, bazadan ko‘rihs mumkin. Bunday telefon tarmoqqa ulanmaydi va ishlatgandan foyda yo‘q. IMEI’ni telefonning “Settings → General → About” bo‘limidan olib, imei24.com orqali tekshirish mumkin. Bozorda “bloklangan, lekin ishlaydi” degan gaplar ko‘p uchraydi — ishonmang, u baribir muammo chiqaradi.

iCloud blok bo‘lmasin

Ikkinchi qo‘l telefon olganda eng ko‘p uchraydigan muammo bu — iCloud qulflangan iPhone. Agar telefon qayta yoqilganda Apple ID so‘rasa, undan foydalanib bo‘lmaydi. Sotuvchidan iCloud’dan oldingizda chiqib berishini so‘rang. Shunday qilmasa, unda indamay ketavering. Bunday telefon pul sarflashga arzimaydi.

Batareya asosiy mezonlardan biri

Ishlatilgan iPhone’da eng ko‘p qiynaydigan narsa — batareya. Uni Setting—Battery—Battery Health bo‘limidan ko‘rish mumkin. Agar batreya 85% dan past bo‘lsa, telefon tez o‘chadi yoki kun bo‘yi quvvatlagich izlashga to‘g‘ri keladi. Apple rasmiy ma’lumotiga ko‘ra, batareya 80% dan past bo‘lsa, telefonni almashtirish tavsiya qilinadi.

Korpus va ekran holatini ko‘zdan kechiring

Telefonni qo‘lingizga olib, yon tomonlarini, kamera va portlarni tekshiring. Katta tirnalish yoki ezilish bo‘lsa, demak telefon tushib ketgan bo‘lishi mumkin.

Ekranda nuqta, rang o‘zgarishi yoki sarg‘ayish bo‘lsa, ehtimol ekran original emas. Ta’mirlangan ekran keyinchalik yana muammo chiqarishi mumkin.

Face ID va kamera ishlashini tekshirib ko‘ring

Face ID’ni tekshirib ko‘rishni unutmang. Ko‘p ishlatilgan iPhone’larda Face ID ishlamay qolgan bo‘ladi. Uni joyida sinab ko‘ring. Foto va video sifatini, stabilizatsiyani, old hamda orqa kamerani tekshirib oling.

Ovoz va quvvatlash joyi

Oddiy qo‘ng‘iroq qilib, ovoz kuchi va sifatini tinglang. Shovqin yoki oqsash bo‘lsa, speakerga suv tekkan yoki buzilgan bo‘lishi mumkin. Quvvatlash joyi qiyin ulangan bo‘lsa chang bosgan yoki ta’mirlangan bo‘lishi mumkin.

Telefon yangi yoki ta’mirlanganligini aniqlang

“Settings → General → About” bo‘limidan model kodini ko‘ring. Birinchi harf telefonning kelib chiqishini bildiradi:

M — Yangi, original

F — Refurbished (ta’mirlangan)

N — Kafolat bo‘yicha almashtirilgan

P — Maxsus buyurtma

Agar sotuvchi original deyib turib, telefonda “F” yozilgan bo‘lsa demak u aldayotgan bo‘ladi.