Ўзбекистонда икки киши совқотишдан вафот этди

Қорақалпоғистоннинг Хўжайли ва Самарқанд вилоятининг Пахтачи туманида икки киши совуқ уриши оқибатида ҳалок бўлди. Бу ҳақда Postda.uz нашри хабар қилди.

Хабарга кўра, 6 декабрь куни бедарак йўқолгани учун қидирувга берилган Қорақалпоғистоннинг Хўжайли тумани “Саришингул” овул фуқаролар йиғини ҳудудида яшаган, 1991 йилда туғилган Н. Р.нинг ташқи кўринишидан жароҳатсиз жасади “Кулаб” овул фуқаролар йиғини ҳудудидан топилган. Ўтказилган суд-тиббий экспертизасининг дастлабки хулосасига кўра, у “тананинг умумий совқотиши”дан ҳалок бўлганлиги аниқланган.

Шунингдек, Самарқанд вилоятининг Пахтачи туманида 17 декабрь куни «Агросаноат» МЧЖга тегишли дала майдонидан 1990 йилда туғилган Н. В.нинг ҳеч бир жароҳатларсиз жасади топилган. Ўтказилган суд-тиббий экспертизасининг хулосасига кўра, у «тананинг умумий совқотиши»дан ўлганлиги маълум бўлган.

Ҳозирда ҳар икки ҳолат юзасидан суриштирув ҳаракатлари олиб борилмоқда.