Maktab, uy va shifoxonalar: AQSh Erondagi tinch aholini qira boshladi

AQSh va Isroil zarbalari natijasida Eronning turli hududlarida tinch aholiga ham katta zarar yetgani aytilmoqda. Eron rasmiylari so‘nggi 24 soat ichida bir nechta viloyatlarda hujumlar sodir bo‘lib, o‘nlab odamlar halok bo‘lganini ma’lum qildi. Yo‘l bo‘yidagi dam olish maskanlari, turar joylar, maktablar va hatto ot sporti majmuasi ham nishonga olingan. Qazvin viloyati xavfsizlik kengashi vakili Shahram Ahadpurning so‘zlariga ko‘ra, Qazvin–Zanjan avtomagistrali bo‘yidagi ikkita dam olish maskaniga berilgan zarba natijasida kamida 30 kishi halok bo‘lgan. Shiraz shahridagi turar joy hududiga berilgan hujumda yana 20 kishi vafot etgan, 30 dan ortiq odam jarohat olgan.

Tehronda esa ikki nafar o‘quvchi o‘z uyida halok bo‘lgan. Shuningdek, poytaxtdagi bir nechta maktab binolari ham zarar ko‘rgan. Xuziston viloyatida sodir bo‘lgan hujumda to‘rt nafar chegarachi halok bo‘lgani xabar qilindi. Eron Qizil Yarim Oy jamiyati ma’lumotiga ko‘ra, hujumlar davomida ko‘plab oddiy obyektlar ham vayron bo‘lgan. Jumladan, 3 646 ta turar joyga zarar yetgan, 528 ta savdo nuqtasi vayron qilingan, 14 ta tibbiyot markazi ham zarbadan shikastlangan.

Tashqi ishlar vazirligi vakillari hujum qilingan joylar orasida kasalxonalar, maktablar, tez yordam punktlari va hatto chaqaloqlarni parvarish qiladigan markaz ham borligini aytmoqda. Shahram Ahadpur fuqarolarni ommaviy joylardan uzoqroq yurishga va ehtiyot choralarini ko‘rishga chaqirdi. Uning aytishicha, hujumlarda yana ko‘plab odamlar jarohat olgan. Abyek shahridagi radio markaziga ham zarba berilgan, ammo u yerda katta zarar kuzatilmagan.

Shirazga raketa hujumi

Eronning Fars viloyatidagi Shiraz shahrida joylashgan Zibashahr turar-joy hududiga raketa zarbasi berildi. Natijada kamida 20 nafar tinch aholi halok bo‘ldi, yana 30 kishi jarohat oldi. Bu haqda viloyat hokimining o‘rinbosari Jalil Hassani ma’lum qildi.

Uning aytishicha, hujum tinch aholi yashaydigan hududga qaratilgan. Zarba natijasida yaqin atrofdagi tez yordam stansiyasi ham butunlay vayron bo‘lgan. O‘sha paytda xizmatda bo‘lgan ikki nafar feldsher ham halok bo‘lgan. Hududdagi bir nechta kommunal obyekt va infratuzilma ham zarar ko‘rgan.

Rasmiylar yana bir muhim ogohlantirish ham berdi. Fars viloyatining ayrim joylarida noma’lum odamlar uyma-uy yurib, o‘zlarini rasmiylar yoki yordam xodimlari deb tanishtirib, aholini uylarini tark etishga chaqirmoqda. Hokimlik bu xabarlar yolg‘on ekanini aytib, bunday harakatlar odamlar orasida qo‘rquv tarqatish uchun qilinayotganini ta’kidladi.

Tehronda maktablar zarar ko‘rdi, o‘quvchilar halok bo‘ldi

Tehronda davom etayotgan zarbalar oqibatida bir nechta maktab ham jiddiy zarar ko‘rdi. Bu haqda Eron Ta’lim vazirligining axborot markazi rahbari Husayn Sodiqiy ma’lum qildi. Uning aytishicha, poytaxtning turli tumanlaridagi maktablarga zarba berilgan.

Masalan, 6-tumanda joylashgan Allameh Helli-5 maktabi shikastlangan va hozircha undan foydalanish qiyin bo‘lishi mumkin. 7-tumandagi Shahed Hamedani boshlang‘ich maktabi ham ancha zarar ko‘rgan. Bundan tashqari, 12 va 7-tumanlardagi yana bir nechta maktab binolariga ham shikast yetgan, ammo u yerda zarar nisbatan kamroq ekani aytilmoqda. Hujumlar faqat maktablarga emas, oddiy uy-joylarga ham ta’sir qilgan. Tehronning 14-tumanida yashagan ikki nafar o‘quvchi o‘z uyida halok bo‘lgan, yana bir nechta o‘quvchi esa jarohat olgan.

Tabriz yaqinidagi otxonaga zarba berildi

Sharqiy Ozarbayjon viloyatida, Tabriz–Sufiyon yo‘li bo‘yida joylashgan otlar saqlanadigan bino hujum natijasida butunlay vayron bo‘ldi. Rasmiylar bu hujumni AQSh va Isroil bilan bog‘lab, uni shafqatsiz zarba deb atamoqda. Viloyat veterinariya boshqarmasi rahbari Mehdi Hami bergan ma’lumotga ko‘ra, portlash oqibatida bir nechta ot halok bo‘lgan. Dastlabki xabarlarga qaraganda, zarba kuchli bo‘lgani sabab bino qulab tushgan va ayrim otlar vayronalar ostida qolib ketgan. Shundan so‘ng qutqaruvchilar voqea joyiga yetib kelib, hayvonlarni chiqarish uchun ish boshlagan. Mutaxassislar vayronalar orasidan uchta halok bo‘lgan otni topgan. Ular sanitariya qoidalariga muvofiq ko‘milgan, atrof hudud esa dezinfeksiya qilingan. 

Qizil Yarim Oy fuqarolik obyektlariga katta zarar yetganini ma’lum qildi

Eron Qizil Yarim Oy tashkiloti mamlakat bo‘ylab ko‘plab tinch obyektlar zarbaga uchraganini ma’lum qildi. Tashkilot rahbari Pirhossein Kulivandning aytishicha, AQSh va Isroil tomoni “fuqarolik hududlariga hujum qilinmayapti” degan bayonotlari haqiqatga to‘g‘ri kelmaydi. Uning so‘zlariga ko‘ra, hatto u matbuotga gapirayotgan paytda ham Tehrondagi ko‘plab turar joy hududi zarbaga uchragan. Qizil Yarim Oy hisob-kitoblariga ko‘ra, hujumlar natijasida 3646 ta turar joy va boshqa tinch obyektlar zarar ko‘rgan. 528 ta savdo binosi butunlay vayron bo‘lgan. Bundan tashqari, 14 ta tibbiyot muassasasi — jumladan shifoxonalar, reabilitatsiya markazlari va kichik jarrohlik markazlari ham zarbaga uchragan. Ularning ichida uchta shifoxona butunlay ishlamay qolgan.

Kulivandning aytishicha, hozirgacha kamida 105 ta tinch obyekt hujumga uchragan. Qurbonlar orasida bolalar, talabalar va keksalar ham bor. U bu holatni tinch aholiga qarshi qilingan og‘ir zarbalar deb baholadi. Qizil Yarim Oy tashkiloti bu voqealarni xalqaro darajada ko‘rib chiqish uchun hujjatlarni tayyorlab, Xalqaro Qizil Xoch qo‘mitasi, Xalqaro jinoyat sudi prokurori va boshqa xalqaro tashkilotlarga yuborgan. Shuningdek, tashkilot xalqaro kuzatuvchilarni zarba berilgan hududlarga kelib vaziyatni o‘z ko‘zi bilan ko‘rishga chaqirdi.

 Hujumga uchragan tinch obyektlar ro‘yxati e’lon qilindi

Eron Tashqi ishlar vazirligi vakili so‘nggi kunlarda AQSh va Isroil hujumlari oqibatida zarar ko‘rgan tinch obyektlar ro‘yxatini e’lon qildi. Uning aytishicha, zarbalar faqat harbiy nishonlarga emas, balki oddiy fuqarolar foydalanadigan joylarga ham berilgan.

Ma’lumotlarga ko‘ra, hujumlar natijasida turar joylar, shifoxonalar, maktablar, qutqaruv markazlari va hatto tarixiy obidalar ham zarar ko‘rgan. Masalan, Tehrondagi Nilufar maydoni yaqinidagi uy-joy hududida zarba oqibatida 20 dan ortiq tinch aholi halok bo‘lgan. Sanandaj shahridagi katta turar joy majmuasi ham hujumga uchragan.

Shuningdek, Tehrondagi bir nechta shifoxonalar, jumladan Gandi, Motahari, Valiasr va Khatam al-Anbia shifoxonalari ham zarbadan zarar ko‘rgan. Tehron Grand bozori, Qizil Yarim Oy tashkiloti binosi yaqinidagi hudud, ijtimoiy himoya tashkiloti binosi ham hujumlar oqibatida zarar ko‘rgan.

Ba’zi maktablar va bolalar bog‘chalari ham zarbadan shikastlangan. Narmak tumanidagi bolalar bog‘chasi va bir nechta maktabga ham zarar yetgan. Fars viloyatidagi Lamerd shahrida esa sport zaliga zarba berilgan va bu yerda 18 nafar bola va o‘smir halok bo‘lgani aytilmoqda. Umuman olganda, Fars viloyatida 35 nafar tinch aholi qurbon bo‘lgani ma’lum qilingan. Bu ro‘yxat hali yakuniy emas. Hujumlar oqibatida zarar ko‘rgan tinch obyektlar soni bundan ham ko‘p bo‘lishi mumkin.