Иситма, кўнгил айниши, йўтал: гриппми ёки навбатдаги эпидемия?

Ижтиомий тармоқларда республиканинг кўплаб ҳудудларида аҳоли ўткир респератор вирусли инфекциялардан азият чекаётгани ҳақида постлар тарқалиб кетди. Ҳолат юзасидан эса соғлиқни сақлаш вазирлиги ўткир вирусли инфекцияларга чалинган беморларни самарали даволаш бўйича йиғилишида баёнот берди.

Одатда грипп ва ўткир респиратор вирусли инфекцияларнинг тарқалиши куз-қиш мавсумида анчагина жадаллашади. Бу мавсумда эса асосан ёшларда ўткир респираторли грипп тарқалганлиги кузатилмоқда. Ушбу касалликка чалинганларнинг асосий қисми Тошкент шаҳри ҳудудига тўғри келяпти. 

Аҳоли гриппнинг аломати сифатида 39-40 даража ҳарорат, титроқ босиши, заифлик, кучли йўтални келтиришмоқда. Баъзи одамларда эса ушбу ҳолатда овқат ҳазм қилишдаги муаммо, кўнгил айниши, қусиш ва диарея кузатилган. Грипп бир одамда ойига 2-3 марта такрорланган ҳолатлар ҳам учрамоқда. Бу ҳақида ижтимоий тармоқ фаоллари ўз саҳифасида бонг ура бошлашди.

“Эпидемик вазият жуда чатоқ, вирус тезкор тарқаляпти! Таълим масканларига зудлик билан таътил бериш зарур!!!”, дея хабар қолдирган журналист Аброр Зоҳидов.

Бу юзасидан Соғлиқни сақлаш вазири Амирилло Иноятов йиғилиш ўтказиб, шифохоналарга тушаётган юкламаларни тезда камайтириш, бемор болаларга сифатли тиббий ёрдам кўрсатиш учун зарур чоралар кўриш бўйича масъулларга шошилинч топшириқлар берди. 

Жумладан, Зангиотадаги 1-сонли юқумли касалликлар шифохонасида ушбу ҳолат кузатилган болалар учун ажратилган ўринлар 300 тадан 500 тага ошириши белгиланди. Бундан ташқари, шу кунларда ҳарорат ошиши, йўтал белгилари билан “103” га мурожаатлар ошганлиги сабабли эрталаб соат 6:00дан 14:00 гача пойтахт шифохоналарида заҳирадаги 40 та тез тиббий ёрдам автомобиллари қўшимча иш фаолиятини бошлади. 

Қўшимча маълумот ўрнида айтиш жойизки 25 ноябр санасидан вазирлик тўлиқ жиҳозланган 29 та “Isuzu” русумли тез тиббий ёрдам автомобиллари доимий фойдаланишга ажратилиши ва пойтахтимиздаги 12 та кўп тармоқли марказий поликлиника ва 72 та оилавий поликлиникада эрталаб соат 8:00 дан кечки 20:00 гача бўлган муддатда чақирув бўйича тиббий бригадалар фаолияти йўлга қўйилганлигини айтиб ўтди. 

“Шу сабабли йиғилишда оилавий поликликлиника шифокорларига ўткир респиратор вирусли инфекцияларга чалинган беморларни амбулатор шароитда даволаш бўйича зарур тавсиялар бериш учун ихтисослаштирилган марказлардаги педиатрлар ва барча тор доирадаги мутахассислар жалб этилиши лозимлиги қайд этилди.” – деб таъкидланди ҳисоботда.