Endilikda iste’molchilar bevosita kunlik va oylik kesimida tabiiy gaz iste’molini kuzatib borishlari mumkin

Gaz sarf-xarajatlarini onlayn kuzatish imkonini beruvchi mobil ilova test sinovida ishga tushirilishi belgilandi.

“Hudud Gaz Ta’minot” mobil ilovasi test sinovida ishga tushiriladi

Ma’lum bo‘lishicha, joriy yil yoz faslida “Hududiy elektr tarmoqlari” AJ tomonidan yangi “HET Billing Mobile” mobil ilovasi ishga tushirilganida, iste’molchilardan “Tabiiy gaz iste’moli uchun ham xuddi shunday mobil ilova ishlab chiqilsa, durust bo‘lardi”, degan ko‘plab takliflar bildirilgandi.

Ushbu takliflar inobatga olinib, Energetika vazirligi hamda “Hududgazta’minot” AJ tomonidan aholi iste’molchilarining tabiiy gaz sarfi va xarajatlarini onlayn kuzatish imkonini beruvchi “Hudud Gaz Ta‘minot” mobil ilovasi test sinovida ishga tushirildi.

Ilova dasturi avtomatlashtirilgan holda yangilab boriladi

Ayni paytda iste’molchilar mazkur ilovani Android hamda iOS operatsion tizimi qurilmalari orqali bepul yuklab olishlari mumkin. Mobil ilova dasturi avtomatlashtirilgan holda yangilab boriladi.

Shuningdek, mazkur ilova orqali iste’molchilar bevosita kunlik va oylik kesimida tabiiy gaz iste’molini kuzatib borish, xususan, gaz hisob raqamlariga to‘lov qilish hamda suyultirilgan gaz iste’molchilari o‘z hisoblarini to‘ldirish va biriktirilgan ballonlar ro‘yxatini ko‘rib borish imkoniyatiga ega bo‘ladilar.

Ilovani yuklab olgandan keyin unga tegishli shaxsiy hisob raqami hamda One ID xizmati orqali ulanish mumkin.