“Euronews”да Ўзбекистон ҳақидаги видеороликлар эфирга узатиляпти (+видео)

Euronews халқаро телеканали Президент Шавкат Мирзиёевнинг БМТ Бош ассамблеясининг 75-сессиясида илгари сурган ташаббусларига бағишланган «Янги Ўзбекистон — келажакни севадиган инсонлар» деб номланган туркум видеороликларни эфирга узатмоқда.

Телеканал кўрсатувида Ўзбекистон раҳбарининг Марказий Осиёнинг барқарор ривожланишига таҳдид солувчи глобал иқлим ўзгаришини олдини олишга қаратилган Орол денгизи минтақасини экологик инновациялар ва технологиялар зонаси, деб эълон қилиш тўғрисида БМТ Бош ассамблеясининг махсус резолюциясини қабул қилиш бўйича таклифи ҳақида батафсил маълумот берилган.

Euronews Ўзбекистон Президенти ЮНEСКО билан ҳамкорликда 2021 йил Хива шаҳрида «Марказий Осиё дунё цивилизациялари чорраҳасида» Халқаро форумини ўтказиш ташаббуси билан чиққанини ҳам маълум қилди. Материалда таъкидланишича, ушбу тадбир минтақа мамлакатларини маданий, тарихий ва илмий томондан ривожлантиришда ёрдам беради. «ЮНEСКО Бош директори Одри Азуле ушбу ташаббуснинг муҳимлигини таъкидлади», дейилади хабарда.

Яна бир видеороликда Ўзбекистон президентининг БМТ шафелигида транспорт ва коммуникацияларни ўзаро боғлашни ривожлантириш минтақавий марказини яратиш таклифига эътибор қаратилди. «Ушбу ташаббус минтақанинг глобал иқтисодий, логистика ва транзит йўлакларига чуқур интеграциясини таъминлашга мўлжалланган мамлакатлар ўртасидаги ўзаро товар айирбошлаш ҳажмини янада оширишга қаратилган», дейди Euronews.

БМТ ҳузурида Афғонистоннинг ижтимоий ва иқтисодий ривожланишига ҳисса қўшадиган Афғонистон бўйича доимий қўмита ташкил этилиши алоҳида таъкидланган. «Ушбу ташаббус қўшни мамлакатда тинчлик ва барқарорликни ўрнатишга хизмат қилади. Фақатгина биргаликдаги саъй-ҳаракатлар ва яқин ҳамкорлик орқали афғон халқининг умидлари амалга ошиши мумкин», — дейди телеканал мухбири.

Ўзбекистон Электрон оммавий ахборот воситалари миллий ассоциацияси томонидан тайёрланган видеороликлар 2020 йил 9 ноябрга қадар эфирга узатилади.

Маълумот учун Euronews — етакчи халқаро янгиликлар канали ва Европанинг энг йирик янгиликлар маркази саналади. Телеканал Европа телерадиоэшиттиришлар иттифоқи ташаббуси билан 1993 йил ташкил этилган. Унинг бош қароргоҳи Лион шаҳри (Франция)да жойлашган. Телевизион компания тизимида 30 дан ортиқ турли миллат вакилларининг 600 дан ортиқ журналисти фалдият юритади. Канал туну кун 12 тилда эфирга узатилади. Ойига глобал аудитория 160 мамлакатда 134 миллион кишини ташкил қилади.