Mast haydovchi “KamAZ” bilan doʻkonni buzdi

Zarbdor tumanida yuk mashina haydovchisi “KamAZ”da Spark avtomobili va savdo doʻkoniga shikast yetkazdi.

Holat Jizzax viloyatida sodir boʻlgan

Qayd etilishicha, 28-may kuni soat 01:19 larda Jizzax viloyati Zarbdor tumani “Ravot” MFYda joylashgan savdo doʻkoni ish yurituvchisi viloyat IIBning 102 xizmatiga qoʻngʻiroq qilib “KamAZ” rusumli yuk avtomashinasi egasi savdo doʻkonini buzib tashlaganini maʼlum qilgan.

“KamAZ” haydovchisi Spark egasi bilan tortishib qolgan

Holat yuzasidan olib borilgan tergovga qadar tekshiruvlar davomida Zomin tumani “Nurlikent” MFYda yashovchi 26 yoshli T.Sh. “KamAZ” rusumli yuk avtomashinasini mast holda savdo doʻkoni oldiga boshqarib kelib, doʻkon yonida turgan 24 yoshli H.R va uning sherigi U.O. bilan oʻzaro tortishib qolgani aniqlangan.

Musht yetganiga chiday olmagan erkak doʻkonni buzdi

Natijada fuqaro H.R. haydovchining yuz qismiga bir marotaba urib, tan jarohati yetkazgan. Shundan soʻng T.Sh. jahl ustida oʻzi boshqaruvidagi yuk avtomashinasiga oʻtirib, uni haydab, shu yerda turgan H.R.ga tegishli Spark rusumli avtomashinaning orqasidan urib yuborib, avtomashina va savdo doʻkoniga moddiy zarar yetkazgan.

Voqea ishtirokchilariga huquqiy baho beriladi

Hodisa sodir boʻlgan joy tergov-tezkor guruhi tomonidan koʻzdan kechirilib, hozirda tergovga qadar tekshiruv davom etmoqda. Tergov natijalariga koʻra ushbu voqea ishtirokchilarining xatti-harakatlariga huquqiy baho beriladi.