Qashqadaryolik bloger uni rad qilgan qizni shantaj qildi

Qashqadaryoda mahalliy bloger u bilan gaplashishdan bosh tortgan qizdan qattiq qasd oldi. U Instagram’da qizning nomidan soxta profil yaratib, u yerga montaj qilingan ochiq-sochiq suratlarni joylab borgan. Bu haqda Ichki ishlar vazirligi huzuridagi Kiberxavfsizlik markazi xabar berdi. 

Voqea aslida qanday bo‘lgan?

Shahrisabz tumanida yashovchi qiz huquq-tartibot organlariga murojaat qilib, noma’lum shaxs Instagram’da uning nomidan profil ochganini aytdi. Ushbu akkaunt orqali qizning yuzini boshqa ayollarning yalang‘och tanalariga qo‘yib montaj qilingan suratlar tarqatilgan. 

Mazkur holat bo‘yicha darhol jinoyat ishi qo‘zg‘atildi. Olib borilgan tezkor tadbirlar natijasida jinoyat ortida mahalliy bloger turgani aniqlandi. 

Tergov davomida ma’lum bo‘lishicha, bloger ilgari qiz bilan tanishgan va u bilan muloqotda bo‘lgan. Ammo oralarida kelishmovchilik yuzaga kelib, ular aloqani uzishgan. Bundan jahli chiqqan bloger qizning eski suratlarini internetdan topilgan ochiq-sochiq suratlar bilan montaj qilib, Instagram’da tarqatgan. 

Blogerning iqrorligi

Tergov jarayonida Xaydarov o‘z qilmishini tan oldi.

“Men u bilan tanishganman, biroz muloqot qilganmiz, lekin keyin kelishmovchilik bo‘lib, aloqamiz uzildi. Shundan so‘ng uning Instagram’dagi suratlarini oldim, internetdan boshqa rasmlar topdim va montaj qildim. Keyin esa ularni sahifaga joyladim. Bu ishni qilganimdan afsusdaman”, — dedi u. 

Jinoyatchini qanday jazo kutmoqda?

O‘zbekistonda bu kabi harakatlar Jinoyat kodeksining 141-3-moddasiga binoan jinoiy javobgarlikka sabab bo‘ladi. Qonunga ko‘ra, birovning roziligisiz uning shaxsiy foto yoki videolarni tarqatish yoki bunday materiallarni tarqatish bilan tahdid qilish qat’iy taqiqlanadi. Bunday jinoyatlar uchun BHMning 400 baravaridan 600 baravarigacha jarima (taxminan 150–225 million so‘m), 360 soatgacha majburiy jamoat ishlari yoki 3 yilgacha axloq tuzatish ishlari kabi jazo choralari belgilangan.