Joriy yil davomida 442 geologik obyekt auksionga qo‘yildi

"Yer qa’ridan foydalanish markazi" davlat muassasasi vakillari tomonidan bildirilishicha, 11 turdagi davlat xizmatlari to‘liq elektron shaklga o‘tkazildi va "Front-office" mexanizmi orqali 400 dan ortiq tadbirkorlarga yordam ko‘rsatildi. Bundan tashqari, qisqa raqamli "Call-markaz" faoliyati orqali aholi va tadbirkorlarning savollariga tezkor javoblar berilmoqda.

Auksiondagi asosiy raqamlar

 11 ta yer qa’ri uchastkasi strategik foydali qazilmalar uchun taklif etilib, 9 tasi sotildi. 

 412 ta uchastka noruda xomashyo qazib olish va qidiruv ishlari uchun taklif qilinib, 167 tasi sotildi. 

Qimmatbaho metallarning qo‘l mehnati usulida qazib olinishi uchun 19 ta uchastka sotildi.

"Yer qa’ri to‘g‘risida"gi yangi qonun

2024-yil 31-oktabr kuni "Yer qa’ri to‘g‘risida"gi qonun yangi tahrirda qabul qilindi. Qonun xalqaro tajribalar asosida ishlab chiqilgan va xorijiy hamda mahalliy investorlar uchun qulay shart-sharoitlarni kengaytiradi.

Raqamlashtirish ishlari davom etmoqda:

- Geologik ma’lumotlarni my.gov.uz orqali taqdim etish imkoniyati yaratildi. 

- "Geomonitoring" axborot tizimi yil oxirigacha ishga tushiriladi. 

- Tadbirkorlar uchun "Shaxsiy kabinet" moduli yaratilmoqda.

"Geomonitoring" tizimining afzalliklari

Yangi tizim yer qa’ri uchastkalaridan foydalanishni monitoring qilish, hisobotlarni shakllantirish va foydalanuvchilarning faoliyatini nazorat qilish imkonini beradi.

Yer qa’ridan foydalanishning elektronlashtirilishi tadbirkorlar uchun qulaylik yaratib, sanoat rivoji va iqtisodiyotni raqamlashtirishga katta hissa qo‘shmoqda. Yangi qonun esa yer qa’ridan samarali va mas’uliyatli foydalanishning zamonaviy asoslarini yaratadi.