Eskini yamaguncha, esing ketadi

Ijtimoiy tarmoqlarda 17 yoshli yigitning attraksiondan tushib ketgan videosi tarqaldi. Favqulodda vaziyatlar boshqarmasi xabar berishicha, ushbu holat Jizzax shahrida joylashgan "O‘rda" istirohat bog‘idagi attraksionlardan birida sodir bo‘lgan.

Voqea qanday yuz bergan?

Joriy yilning 1-iyun kuni soat 20:00 larda Paxtakor tumanida yashovchi 2007-yili tug‘ilgan fuqaro M.O‘. oila a’zolari bilan "O‘rda" ekologik istirohat bog‘iga aylanishga kelgan. Fuqaro attraksionda uchish vaqtida xodimlarning ogohlantirishlariga qaramay, attraksion to‘liq to‘xtamasdan himoya kamarini yechib yuborgani uchun yiqilgan. Ma’lumotlarga qaraganda, fuqaro hech qanday tan jarohati olmagan. Ushbu ko‘ngilsizlik sodir bo‘lgan vaqtda attraksionda nosozliklar bo‘lmagan. Fuqaro o‘zining ehtiyotsizligi sabab, attraksiondan yiqilib tushgan.

Yelim tasma bilan mustahkamlangan attraksionlar

Ushbu voqealar fonida bundan avvalroq 16-aprel kuni Termiz shahridagi “Bolajon” istirohat bog‘idagi “Quvnoq tepalik” attraksionidagi o‘rindiq sinib, to‘rt nafar fuqaro turli xil jarohatlar bilan Respublika shoshilinch tibbiyot markaziga yotqizilgan edi. Shahar markazidagi “Bolajon” istirohat bog‘i “Termiz avenue park” mas’uliyati cheklangan jamiyatiga qarashli bo‘lib, holat yuzasidan huquq-tartibot idoralari tekshiruv harakatlari olib borilayotgandi. Shunga o‘xshash voqealardan yana biri, avvalroq Telegram ijtimoiy tarmoqlarida bir qizning yelim tasma bilan o‘ralgan charxpalakda qo‘rqib videoga olgan. Mas’ullarning xabar berishicha, attraksion Andijon shahridagi “Bog‘ishamol” parkida joylashgani, ushbu istirohat bog‘idagi hech qaysi attraksion texnik ko‘rikdan o‘tmagani aytilgan. Ma'limot uchun, O‘zbekistondagi 1845 ta attraksiondan atigi 5-6 foizi texnik ko‘rikdan o‘tgan.