Наманганда Алишер Усмонов халқаро бизнес маркази қуради

Алишер Усмонов томонидан Наманганда халқаро бизнес маркази қурилиши режалаштирилмоқда. Бу ҳақда Наманган вилояти ҳокимлиги ахборот хизмати хабар қилди.

Хабарда қайд этилишича, Наманган шаҳрида 6 гектарни эгаллаган Амир Темур кўчасидаги собиқ “Кичкинтойлар боғи” ўрнида UMS Holding асосчиси, машҳур тадбиркор Алишер Усмонов томонидан Халқаро бизнес маркази қурилиши режалаштирилган. 

Ушбу марказ Конгресс-холл, бизнес мактаби, меҳмонхона, экопарк, спорт-соғломлаштириш иншоотларини ўз ичига олади. Сунъий кўллар, фавворалар, автотураргоҳлар барпо этилади.

— Халқаро бизнес маркази қурилиши баҳор ойларидан бошланади. Бу ерда келгусида халқаро симпозиумлар, бизнес-форумлар ўтказилиши кўзда тутилган. Шу орқали Наманганга инвестициялар кириб келиши жадаллашади, бизнес-туризм учун кенг имкониятлар яратилади. Мазкур марказ Наманганнинг ўзига хос брендига айланади, — дейди вилоят ҳокими Ш.Абдураззақов.

Шунингдек, Шавкатжон Абдураззақов қурилиш олиб борилиши режалаштирилган ҳудудда ободонлаштиришга эътибор қаратиш, котлован атрофида хавфсизлик масалаларини кўздан қочирмаслик зарурлигини таъкидлади.