1 854 ta o‘lim: Qaysi viloyatda YTH qurbonlari ko‘p?

O‘zbekistonda yo‘l-transport hodisalari bilan bog‘liq vaziyat jiddiyligicha qolmoqda. Rasmiy statistik ma’lumotlarga ko‘ra, 2025-yil davomida mamlakat yo‘llarida minglab avariyalar sodir bo‘lib, mingdan ortiq insonlar hayotdan ko‘z yumdi. Bu raqamlar yo‘l harakati xavfsizligi masalasi hanuz dolzarbligini yo‘qotmaganini ko‘rsatmoqda.

Bir yil ichida qariyb ikki ming qurbon

Hisobotlarga asosan, 2025-yilda respublika bo‘yicha 9 245 ta yo‘l-transport hodisasi qayd etilgan. Ushbu avariyalar oqibatida 1 854 nafar fuqaro halok bo‘lgan, 7 391 kishi esa turli darajadagi tan jarohatlari bilan shifoxonalarga murojaat qilgan. Ayniqsa, yil yakuni fojiaviy bo‘lib, faqat dekabr oyining o‘zida 190 nafar inson yo‘llarda hayotdan ko‘z yumgan.

2026-yil boshida ham og‘ir holat qayd etildi

Yangi yil ham yo‘llardagi xatarlar bilan boshlandi. 2026-yil yanvar oyining dastlabki 11 kunida 45 nafar kishi yo‘l-transport hodisalari sababli vafot etgan. Eng ko‘p o‘lim holatlaridan 8 tasi Toshkent viloyati hissasiga to‘g‘ri kelgan.

Hududlar kesimida eng xavfli nuqtalar

2025-yil statistikasi hududlar o‘rtasida sezilarli tafovut mavjudligini ko‘rsatdi. Eng ko‘p o‘lim holatlari Samarqand viloyatida qayd etilib, bu ko‘rsatkich 242 nafarni tashkil etgan. Toshkent viloyatida 225, Farg‘ona viloyatida 199 va Surxondaryo viloyatida 167 nafar inson YTH qurboniga aylangan.

Ayrim hududlarda vaziyat yomonlashgan

2024-yil bilan solishtirilganda, ayrim hududlarda yo‘l-transport hodisalari oqibatidagi o‘limlar soni oshgani kuzatilgan. Xususan, Xorazm viloyatida bu ko‘rsatkich keskin — 40 taga ko‘paygan. Shuningdek, Qashqadaryo (+14), Surxondaryo(+8), Farg‘ona(+3) viloyatlari va Qoraqalpog‘iston Respublikasi(+13)da ham o‘sish qayd etilgan.

Eng kam qurbon qayd etilgan hududlar

Statistik ma’lumotlarga ko‘ra, Sirdaryo viloyati yo‘llarida nisbatan kam — 47 nafar inson vafot etgan. Shuningdek, Navoiy (67 kishi) va Buxoro (72 kishi) viloyatlari eng past ko‘rsatkichga ega hududlar sifatida qayd etilgan.

Mutasaddi idoralar tomonidan turli profilaktik choralar ko‘rilayotganiga qaramay, yo‘l-transport hodisalari oqibatidagi o‘limlar soni hanuz yuqori darajada qolmoqda. Mutaxassislar bu borada faqat nazoratni kuchaytirish emas, balki haydovchilar va piyodalar madaniyatini oshirish, yo‘l infratuzilmasini yaxshilash zarurligini ta’kidlamoqda. Aks holda, raqamlar ortidagi fojealar davom etaverishi mumkin.