BYD bu safar ro‘yxatda yo‘q: 2024-yilning eng xavfsiz avtomobillari e’lon qilindi

Yevropa avtomobil xavfsizligi tashkiloti Euro NCAP tomonidan o‘tkazilgan krash-testlar natijasida 2024-yilning eng xavfsiz avtomobillari e’lon qilindi. Ushbu sinovlar avtomobillarning faol va passiv xavfsizlik darajasini, piyodalar uchun xavfsizlikni va zamonaviy xavfsizlik texnologiyalarining samaradorligini baholaydi. Yil davomida yuzlab avtomobillar sinovdan o‘tkazilib, eng yuqori natijalarni qayd etgan modellarga mukofotlar topshirildi.

Zeekr X — elektromobillar va kichik krossoverlar yetakchisi

Xitoyning Zeekr X modeli ikki toifada g‘oliblikni qo‘lga kiritdi: “Eng xavfsiz elektromobil” va “Eng yaxshi kichik krossover”. Euro NCAP mutaxassislarining fikriga ko‘ra, ushbu avtomobil o‘z sinfida piyodalar, haydovchi va yo‘lovchilar xavfsizligini ta’minlash bo‘yicha yuqori natijalarga ega. Xavfsizlik bo‘yicha Xitoy ishlab chiqaruvchilarining bunday yutuqlari ularning global bozordagi obro‘sini oshirishiga xizmat qilmoqda.

Mazda CX-80 — yirik krossoverlar ichida yetakchi

Mazda CX-80 o‘z sinfida xavfsizlik bo‘yicha birinchi o‘rinni egalladi. Bu model yirik oila uchun mo‘ljallangan bo‘lib, o‘zining zamonaviy xavfsizlik tizimlari bilan nafaqat haydovchi va yo‘lovchilarni, balki atrof-muhitni ham samarali himoya qiladi.

Skoda Superb — oilaviy avtomobillar ichida birinchi o‘rinda

Skoda Superb katta oilaviy avtomobillar orasida eng xavfsiz model deb topildi. Yirik hajmli avtomobillar orasida ushbu model o‘zining bardoshli tuzilishi va yuqori darajadagi xavfsizlik tizimlari bilan ajralib turdi.

Mercedes-Benz E-Class — mutlaq g‘olib

Toifalardan qat’i nazar, Mercedes-Benz E-Class modeli yilning eng xavfsiz avtomobili sifatida tan olindi. Modelning faol xavfsizlik tizimlari va zarbalarga chidamliligi mukammal darajada baholandi. Mercedes-Benz kompaniyasi yana bir bor avtomobil xavfsizligi sohasida global yetakchi ekanligini isbotladi.

Eng xavfli avtomobil qaysi?

Euro NCAPning Janubiy Amerika bo‘yicha hamkori Latin NCAP tomonidan o‘tkazilgan sinovlarda Renault Logan avtomobili xavfsizlik bo‘yicha muvaffaqiyatsizlikka uchradi. Model beshta yulduzdan nol yulduz oldi. Haydovchi va yo‘lovchilar xavfsizligi 32,8 foiz, bolalar xavfsizligi 61,2 foiz, piyodalar xavfsizligi esa 46,3 foiz deb baholandi. Bundan tashqari, faol xavfsizlik tizimlarining ishlashi nolga teng deb topildi.

Xitoyning Aito M9 modeli xavfsizlik bo‘yicha yuqori natijaga erishdi

C-NCAP uslubi bo‘yicha o‘tkazilgan sinovlarda Aito M9 krossoveri Xitoyning eng xavfsiz avtomobili sifatida tan olindi. Model umumiy xavfsizlik bo‘yicha 93,9 ball to‘pladi. Haydovchi va yo‘lovchilar xavfsizligi 96,98 foiz, piyodalar xavfsizligi 75,38 foiz, faol xavfsizlik tizimlari samaradorligi esa 97,79 foiz deb baholandi.

O‘zbekistonliklar orasida mashhur BYD avtomobillari bu yil ro‘yxatda yo‘q

BYD avtomobillari so‘nggi yillarda O‘zbekiston bozorida katta mashhurlikka erishib, elektromobillar segmentida yetakchi o‘rinlarni egallab kelmoqda. 2023-yilda BYD Euro NCAP reytingida yuqori natijalar qayd etgan edi. Ammo bu yil kompaniya avtomobillari tashkilotning eng xavfsiz mashinalar ro‘yxatidan joy olmadi. Bu qarorga ATTO 3 modeliga nisbatan bildirilgan ayrim tanqidlar va texnik jihatlar ta’sir qilgani ta’kidlanmoqda.

Euro NCAP ekspertlarining ta’kidlashicha, bu yil BYD avtomobillari xavfsizlikka doir ba’zi talablarni to‘liq bajara olmagan. Ammo kompaniya kelgusida ushbu muammolarni hal qilish va o‘z pozitsiyasini tiklash uchun chora-tadbirlar ko‘rayotgani aytilmoqda.

Sinovlar qanday o‘tkaziladi?

Euro NCAP avtomobillarning xavfsizlik darajasini sinash uchun bir qator tajribalar o‘tkazadi. Ularga:

 — Frontal va yon zarba sinovlari – yo‘lovchilarni zarbalardan himoya qilish darajasini o‘lchash.

 — Piyodalar xavfsizligi sinovlari – avtomobilning piyodalarga ta’sirini minimallashtirish imkoniyatlari.

 — Faol xavfsizlik tizimlari bahosi – to‘qnashuvlarni oldini olishga mo‘ljallangan avtomatik tormozlash va boshqa texnologiyalarning samaradorligi.