AI or Not sun’iy intellekt yordamida yaratiladigan firibgarlikga qarshi kurash uchun 5 million dollar jalb qildi

AI or Not platformasi – bu firibgarlikni aniqlash bo‘yicha taniqli tizim boʻlib, u o‘zining dastlabki sarmoya bosqichida 5 million dollar mablag‘ to‘pladi. Ushbu mablag‘lar "Sun’iy intellektni aniqlash uchun sun’iy intellekt" texnologiyasini rivojlantirishni tezlashtirishga yo‘naltiriladi. Mazkur texnologiya tasvirlar, audio, video va deepfake’larni tahlil qilish orqali firibgarlikning oldini olish va dezinformatsiyaning tarqalishini to‘xtatishga yordam beradi. 

Mazkur sarmoyaga Foundation Capital yetakchilik qilgan bo‘lib, unda GTMFund, Plug and Play va bir qator strategik xususiy investorlar ishtirok etgan.  

Korporativ xavflarning o‘sishi

Tadqiqotlarga ko‘ra, korporativ moliya sohasidagi mutaxassislarning 85 foizi sun’iy intellekt yordamida amalga oshiriladigan firibgarlikni katta xavf deb hisoblaydi. Hatto ularning yarmidan ko‘pi deepfake hodisalari bilan allaqachon to‘qnash kelgan.  

Tahdidlarga qarshi yanada kuchli texnologiyalar

Kelgusi ikki yil ichida AQShda generativ sun’iy intellektdan foydalanilgan firibgarlik tufayli yo‘qotishlar 40 milliard dollardan oshishi mumkin. Shu sababli, AI or Not platformasi o‘tgan yili faol rivojlandi va 250 000 dan ortiq foydalanuvchini jalb etdi. Yangi investitsiyalar esa dezinformatsiyani aniqlash uchun yanada mukammal vositalar yaratish va yangi paydo bo‘ladigan tahdidlarga qarshi kurashda yordam beradi.  

Sun’iy intellektdan keladigan xavflarni yengish

“Biz ko‘zimiz va qulog‘imizga ishonganmiz. Ammo generativ sun’iy intellekt paydo bo‘lishi bilan bu endi oson emas. AI or Not ushbu muammoni hal qilish uchun noyob yechim taklif qiladi. Biz ularning odamlarni, kompaniyalarni, davlatlarni va aktivlarni generativ sun’iy intellekt bilan bog‘liq xavflardan himoya qilish missiyasini qo‘llab-quvvatlaymiz”, – dedi Foundation Capital hamkori Zak Nurani.

AI or Not platformasi kontentning haqiqiyligini tekshirish uchun o‘z algoritmlaridan foydalanadi. U siyosatchilarning deepfake tasvirlaridan tortib, katta yoshdagilarni chalg‘itish uchun ishlatiladigan soxta ovozlarga, hatto mashhur striming platformalaridagi sun’iy intellekt tomonidan yaratilgan musiqalargacha bo‘lgan turli xil soxtaliklarni aniqlaydi.  

Xavfsiz raqamli dunyo sari qadam

 “Generativ sun’iy intellekt katta imkoniyatlarni ochdi, ammo ayni paytda odamlardan tortib yirik kompaniyalargacha bo‘lgan barchaga ta’sir qiladigan suiiste’mollar uchun sharoit yaratdi. Ushbu investitsiyalar bizga sun’iy intellekt bilan bog‘liq firibgarlik va dezinformatsiyani aniqlash va oldini olish uchun foydalanuvchilarga vositalar taqdim etish orqali xavfsiz raqamli dunyo yaratishni davom ettirishga imkon beradi”, – deydi AI or Not bosh direktori Anatoliy Kvitnitskiy. 

AI or Not generativ sun’iy intellektning suiiste’mol qilinishidan odamlar va tashkilotlarni himoya qiladi. Platforma real vaqt rejimida deepfake, firibgarlik va dezinformatsiyani aniqlash uchun ilg‘or vositalarni taqdim etadi va tobora raqamli bo‘lib borayotgan dunyoda axborotning haqiqiyligini ta’minlashga xizmat qiladi.