Alkogol va tamaki mahsulotlarini ishlab chiqarishda nimalarga e’tibor berish kerak?

Alkogol va tamaki mahsulotlarini ishlab chiqarish murakkab texnologik jarayon bo‘lib, qat’iy tartib-taomillar va talablarga rioya qilishni talab etadi, bu O‘zbekiston qonunchiligi asosida qat’iy tartibga solingan faoliyat turidir. Bosh prokuratura huzuridagi Departament qoshidagi Alkogol va tamaki bozorini tartibga solish inspeksiyasi tomonidan mazkur sohada qonunchilikka rioya etilishini nazorat qilish bo‘yicha muntazam tadbirlar olib borilmoqda. Quyida ushbu mahsulotlarni ishlab chiqaruvchi va ulgurji sotuvchilar amal qilishi kerak bo‘lgan asosiy talablar va shartlar haqida so‘z yuritamiz.

1. Mahsulot sifatiga alohida e’tibor

Ishlab chiqarilgan alkogol va tamaki mahsulotlari texnik jihatdan tartibga solish sohasidagi normativ hujjatlar talablariga mos bo‘lishi kerak. Bu talablar mahsulot xavfsizligini, iste’molchilar uchun sifat kafolatini ta’minlaydi.

2. Zamonaviy laboratoriya jihozlari

Zavod yoki ishlab chiqarish korxonasida zarur texnik asbob-uskunalar, kimyoviy reaktivlar va tahlil usullariga ega laboratoriyalar mavjud bo‘lishi shart. Ushbu laboratoriyalar mahsulotning fizik-kimyoviy, mikrobiologik va boshqa parametrlarini tahlil qilish imkoniyatiga ega bo‘lishi lozim.

3. Axborot tizimlarini joriy etish

Ishlab chiqarish va mahsulot aylanish hajmini nazorat qilish uchun raqamli tamg‘alash va kuzatish tizimlari, shuningdek, soliq organlarining axborot tizimiga integratsiyalashgan elektron hisobvaraq-fakturalar joriy etilishi talab qilinadi.

4. Cheklovlarga rioya qilish

Alkogolli mahsulotlar faqat qonunchilikda belgilangan yoshdagi shaxslarga sotilishi kerak bo‘lib, bolalar va voyaga yetmaganlarga mahsulot sotish qat’iyan man etiladi. Tamaki va alkogol mahsulotlarini faqat qonunda belgilangan savdo joylarida sotishga ruxsat berilgan bo‘lib, bunday mahsulotlarni noqonuniy joylarda sotish taqiqlanadi. Savdo faoliyati ruxsat etilgan ish kunlari va belgilangan vaqt oralig‘ida amalga oshirilishi lozim, bu qoidalarga amal qilinmagan holda savdo noqonuniy hisoblanadi.

Reklama qilishda ham qat’iy qoidalar mavjud bo‘lib, mahsulotlarni yoshlar orasida targ‘ib qilish yoki noto‘g‘ri ma’lumotlar orqali reklama qilish qat’iyan man etiladi. Shuningdek, ushbu mahsulotlarni olib kirish va sotishda davlat tomonidan o‘rnatilgan qoidalarga amal qilish orqali noqonuniy aylanishning oldini olish talab qilinadi.

5. Litsenziya talablari

Faoliyatni boshlashdan oldin ishlab chiqaruvchi va ulgurji sotuvchilar litsenziya olishlari shart. Bu jarayon quyidagilarni o‘z ichiga oladi:

 • Ariza berish – Elektron tizim orqali murojaat qilish.

 • Huquqiy hujjatlarni taqdim etish – Uskunalar, ishlab chiqarish quvvatlari va texnologiyalarni tasdiqlovchi hujjatlar.

 • Moliyaviy majburiyatlarni bajarish – Yillik litsenziya to‘lovlarini o‘z vaqtida amalga oshirish

6. Yillik ishlab chiqarish rejasi

Korxona yillik ishlab chiqarish quvvatlarini samarali boshqarishi va qonunchilikka mos ravishda reja asosida faoliyat yuritishi kerak.

7. Monitoring va nazorat

Nazorat organlari tomonidan o‘tkaziladigan monitoring tadbirlariga tayyor bo‘lish, ularning talab va tavsiyalariga rioya qilish ishlab chiqaruvchilarning doimiy e’tiborida bo‘lishi zarur.