Endi O‘zbekiston va Qirg‘iziston o‘rtasidagi pul o‘tkazmalari osonlashadi

Oʻzbekistonning Uzcard milliy toʻlov tizimi va Qirgʻizistonga tegishli Elkart integratsiyasi ikki bosqichda amalga oshiriladi. Bu haqda Trend Qirgʻiziston Respublikasi banklararo protsessing markaziga tayanib ma’lum qildi.

Bosqichlar qanday?

Unga ko‘ra, O‘zbekiston va Qirg‘iziston milliy to‘lov tizimlari o‘rtasida hamkorlik haqida memorandum imzolangan. Ushbu kelishuv ikki davlat o‘rtasida yagona to‘lov ekotizimini yaratishga qaratilgan.

Hamkorlik bir necha bosqichda amalga oshiriladi. Birinchi bosqichda, Uzcard va Elkart kartalari o‘rtasida pul o‘tkazmalari qilish imkoniyati yaratiladi. Ikkinchi bosqichda esa, bankomatlar orqali naqd pul yechish va POS-terminallar orqali xaridlarni amalga oshirish imkoniyati joriy etiladi.

Naqd pulsiz operatsiyalar hajmining oshishi

Loyihada zamonaviy texnologiyalar qo‘llanilib, ma’lumotlarning xavfsizligi va tranzaksiyalarning tezkorligini ta’minlash maqsad qilingan. Bu ikki davlat o‘rtasidagi savdo, turizm va iqtisodiy hamkorlikka yangi imkoniyatlar ochib beradi.

Milliy kartalar orqali chet elda to‘lov qilish imkoniyatining kengayishi, naqd pulsiz operatsiyalar hajmini oshirib, o‘zaro moliyaviy va iqtisodiy aloqalarni yanada mustahkamlashi kutilmoqda.

O‘zbekistondagi to‘lov tizimlarining integratsiyasi

O‘zbekistondagi milliy to‘lov tizimlari hozirda uchta yirik to‘lov tizimlari bilan hamkorlikda ishlaydi. Humo to‘lov tizimi xalqaro to‘lov tizimlari, jumladan, Visa, MasterCard va UnionPay International bilan hamkorlik qilish bo‘yicha ish olib bormoqda. Uzcard to‘lov tizimi esa UnionPay International bilan hamkorlik qilib, UnionPay kartalarini qabul qilish imkoniyatini taqdim etadi. Shuningdek, Humo va Uzcard o‘zaro integratsiya qilingan.

Shunday qilib, Humo to‘lov tizimi hozirda Uzcard, Visa, MasterCard va UnionPay International tizimlari bilan integratsiyalashgan. Uzcard esa Humo va UnionPay International tizimlari bilan integratsiyaga ega.

Integratsiyaning qulayliklari

To‘lov tizimlarining integratsiyasi zamonaviy moliyaviy ekotizimning ajralmas qismiga aylanib, foydalanuvchilarga bir qator qulayliklar yaratadi. Birinchi navbatda, bu turli tizimlardan foydalanishda qulaylikni ta’minlaydi, ya’ni kartalar har qanday bankomat va terminalda ishlaydi. Masalan, Uzcard va Humo tizimlarining o‘zaro integratsiyasi orqali mijozlar har ikkala tizim xizmatlaridan teng foydalana oladi.

Integratsiya xalqaro to‘lovlarni amalga oshirish imkoniyatini ham kengaytiradi. Humo va Uzcard kabi mahalliy tizimlarning Visa, MasterCard va UnionPay kabi xalqaro to‘lov tizimlari bilan hamkorligi foydalanuvchilarga chet elda ham to‘lovlarni qulay va xavfsiz amalga oshirish imkonini beradi.

Shu bilan birga, integratsiya moliyaviy texnologiyalar rivojiga katta hissa qo‘shadi. Yangi innovatsiyalar, masalan, mobil ilovalar va raqamli hamyonlar orqali xizmat ko‘rsatishni soddalashtiradi. Bundan tashqari, birgalikdagi tizimlar yordamida jarayonlarning samaradorligi oshadi, tranzaksiyalar tezroq amalga oshadi va xarajatlar sezilarli darajada kamayadi.

Eng muhimi, integratsiyalashgan tizimlar foydalanuvchilarga kengroq xizmat tarmog‘idan foydalanish imkoniyatini beradi. Bu ularga istalgan joyda to‘lovlarni amalga oshirishda mustaqillik va qulaylik yaratadi. Xavfsizlik jihatdan ham integratsiya yuqori darajali himoya choralarini ta’minlaydi, bu esa foydalanuvchilarning ishonchini oshiradi.

Umuman olganda, to‘lov tizimlarining integratsiyasi zamonaviy moliyaviy xizmatlarning yuqori sifatini ta’minlashda muhim rol o‘ynaydi va foydalanuvchilar bilan xizmat ko‘rsatuvchi tashkilotlar o‘rtasidagi munosabatlarni mustahkamlaydi.

Hindiston bilan integratsiya masalasi

Shuningdek, Hindistonning Unified Payments Interface (UPI) tezkor toʻlov tizimi Humo va Uzcard bilan integratsiyalashuvni amalga oshirishi rejalashtirilgan.

Bundan tashqari, Humo toʻlov tizimi va NPCIning NPCI International shoʻba korxonasi umumiy toʻlov tarmogʻini yaratish boʻyicha kelishuvga erishdi.

Ma’lumot uchun, UPI 2016-yilda ishga tushirilgan va NPCI tomonidan ishlab chiqilgan. Platforma p2p va p2m transferlarini amalga oshirish imkonini beradi.

UPI 2022-yilda global tezkor to‘lov tranzaksiyalarining 46 foizini tashkil etgan. 2024-yil yanvar oyida tranzaksiyalar hajmi $222,1 mlrd.ni tashkil qilgan bo‘lib, bu o‘tgan yilga nisbatan 41,7 foizga ko‘pdir.