Google xodimlarni ishga yollashda xilma-xillik siyosatidan voz kechmoqda

Google kompaniyasi yangi xodimlarni ishga olishda xilma-xillik, tenglik va inklyuzivlik (DEI) siyosatidan voz kechmoqda, deb xabar bermoqda Wall Street Journal nashri.

 DEI tizimi

DEI tizimi — bu Diversity, Equity, and Inclusion (turli-tumanlik, adolat va inklyuziya) tushunchalariga asoslangan boshqaruv tizimi. Ushbu tizim tashkilotlarda yoki jamiyatda har xil kelib chiqish, tajriba va qobiliyatga ega odamlar uchun teng imkoniyatlar yaratishga qaratilgan.

Tarkibiy qismlari

Diversity — tashkilot yoki jamoada turli millat, jins, yosh, madaniyat, jismoniy imkoniyat va boshqa farqlar bo‘yicha xilma-xillikni qo‘llab-quvvatlash.

Equity — har kimga ularning ehtiyojlariga mos keladigan teng imkoniyatlar yaratish. Oldindan mavjud bo‘lgan kamsitishlarni kamaytirish va barchaga adolatli sharoit yaratish.

Inclusion — har kim o‘zini tashkilotning muhim qismi sifatida his qilishi va qaror qabul qilish jarayonlarida ishtirok etishi. Har qanday kamsitish yoki chetlatish holatlarining oldini olish.

Qayerlarda qo‘llaniladi?

Kompaniyalar – ish joylarida xilma-xillikni oshirish va har kimga teng imkoniyat yaratish.

Ta’lim muassasalari – barcha talabalar uchun adolatli ta’lim imkoniyatlarini ta’minlash.

Davlat idoralari – jamiyatda ijtimoiy tenglik va inklyuziyani kuchaytirish.

Notijorat tashkilotlar – kam ta’minlangan yoki chetlanib qolgan guruhlarni qo‘llab-quvvatlash.

Google xodimlari endi adolat va xilma-xillik tamoyillari asosida saralanmaydi

Google turli xil qatlamga mansub xodimlarni ko‘proq yollash maqsadidan voz kechmoqda va xilma-xillik, tenglik hamda inklyuzivlikni ta’minlash bo‘yicha ayrim dasturlarni qayta ko‘rib chiqmoqda. Shu bilan birga, DEI yondashuvini qayta ko‘rib chiqayotgan boshqa texnologik gigantlarga qo‘shilmoqda.

5-fevral, chorshanba kuni kompaniya xodimlariga elektron xatlar yuborib, endilikda maqsadli yollash tizimi mavjud emasligini ma’lum qilgan.

Bunga o‘xshash xilma-xillik bo‘yicha maqsadli yollash ko‘rsatkichlari avvalroq Amazon, Meta, McDonald’s, Ford va Walmart kompaniyalari tomonidan ham bekor qilingan.