BYD endi arzon elektromobillar ishlab chiqaradi

Elektromobillar bozori jadal sur’atlar bilan rivojlanar ekan, yirik avtomobil ishlab chiqaruvchilar yangi auditoriyani qamrab olish uchun arzon va amaliy modellarni taqdim etishga tobora ko‘proq e’tibor qaratmoqda. Ayniqsa, taksi xizmatlari va korporativ avtoparklar uchun mo‘ljallangan elektromobillarga talab oshib bormoqda.

Shu fonda BYD arzon segmentga mo‘ljallangan yangi elektromobil yo‘nalishini ishga tushirmoqda. Kompaniya “Linghui” nomli alohida brend ostida iqtisodiy jihatdan qulay elektromobillarni ishlab chiqarishni rejalashtirgan.

Yangi brenddan uch model

Yangi Linghui markasi asosan taksi xizmatlari hamda katta korporativ avtoparklar ehtiyojlari uchun ishlab chiqiladi. Dastlab ushbu brend ostida uchta model taklif etilishi kutilmoqda. Ular haqidagi dastlabki texnik ma’lumotlar Xitoy sanoat va axborot texnologiyalari vazirligi ro‘yxatida paydo bo‘lgan.

Eng arzoni

Eng arzon variant — Linghui e5 bo‘ladi. Ushbu model avvalgi Qin Plus EV elektromobilining soddalashtirilgan talqini hisoblanadi. Tashqi ko‘rinishda jiddiy o‘zgarishlar yo‘q, faqat bezak elementlari kamaytirilgan. Avtomobil 136 ot kuchiga ega elektromotor bilan jihozlanadi va eng yuqori tezligi 130 km/soatni tashkil etadi. Batareya parametrlari va yurish masofasi hozircha rasman e’lon qilinmagan.

BYD e7 ning yangilangan varianti

Model qatorida keyingi pog‘onani Linghui e7 egallaydi. Bu avtomobil aslida taksi bozori uchun ishlab chiqilgan va 2025-yil bahorida taqdim etilgan BYD e7 modelining qayta nomlangan shaklidir. Texnik ko‘rsatkichlar deyarli o‘zgarmagan: 136 ot kuchli elektromotor, 150 km/soat maksimal tezlik. Xaridorlarga 48 yoki 57,6 kVt/soat sig‘imli batareyalar taklif etiladi, yurish masofasi esa 520 km’gacha yetadi. Asosiy yangilik — kuzovdagi Linghui ramzlari.

Eng yuqori model

Linghui oilasining eng yuqori modeli e9 bo‘ladi. U Han EV platformasiga asoslangan bo‘lib, ilgari taksi uchun mo‘ljallangan BYD e9 sifatida tanilgan. Flagman 204 ot kuchigacha quvvatga ega elektromotorlar bilan jihozlanadi. Avtomobil 60,5 kVt/soatli batareyani saqlab qolishi va taxminan 500 km masofani zaxira quvvat sifatida bosib o‘tishi kutilmoqda.