“НАВОИЙ ИЭС” АЖДА ЁШЛАР ҲАФТАЛИГИ ЎТКАЗИЛДИ

30 июнь – ёшлар куни мамлакатимизда давлат сиёсати даражасида кенг нишонланади. Жумладан, “Навоий ИЭС” акциядорлик жамиятида ушбу сана муносабати билан “Ёшлар ҳафталиги” ташкил этилди.

Таъкидлаш жоиз, мамлакатимизда ёшлар масаласи ҳар доим давлат сиёсати даражасидаги муҳим масала бўлиб келган. Сўнгги йилларда ёш йигит-қизларимиз учун яратилаётган кенг кўламдаги имконият ва шарт-шароитлар, уларнинг ўқиб-ўрганишлари, қизғин фаолият кўрсатишлари учун қаратилаётган эътибор ва ғамхўрлик нафақат юртдошларимиз, балки дунё ҳамжамиятини ҳам ўзига жалб этаётир.

Ҳафталик доирасида биринчи кун Навоий шаҳридаги Ёшлик кўлида станция ёшлари иштирокида веломарафон ташкил этилди.

Иккинчи кунда энергетик ёшлар спортнинг стол тенниси, шахмат, шашка, арқон тортиш турлари бўйича куч синашди. Ҳафталикнинг учинчи кунида “Маънавият карвони” йўлга чиқиб “Навоий иссиқлик электр станцияси” АЖ ёшларига  ўзбек ва жаҳон адабиётининг энг сара китоблари тақдим этилди.

Ёшларнинг интеллектуал салоҳиятларини аниқлаш мақсадида “Ёшлар ҳафталиги”нинг тўртинчи кунида “Заковат” интеллектуал ўйини ташкил этилиб, 7 та гуруҳ ўртасида қизғин баҳс-мунозараларга бой ўйин бўлиб ўтди.

Ҳафталикнинг сўнги кунида станция Бош директори ҳамда Касаба уюшмаси қўмитаси раиси ёшларни байрам билан қутладилар. Сўнгра, цехлараро ташкил этилган “Қувноқлар ва зукколар” жамоалари ўз саҳна кўринишлари орқали йиғилганларга хуш кайфият улашди.

Тадбир якунида мусобақаларда ғолиб бўлган, ҳамда фаол иштирок этган ёшлар станция Касаба уюшмаси қўмитаси томонидан ташаккурнома ҳамда эсдалик совғалари билан тақдирланди.