“ЁШЛАР БИЗНИНГ КЕЛАЖАГИМИЗ!”

Бугун мамлакатимизда бўлгани каби, “Иссиқлик электр станциялари” акциядорлик жамияти тизимида ҳам спортни оммавийлаштириш, соғлом турмуш тарзини шакллантириш борасида қатор амалий ишлар - спорт мусобақалари, интеллектуал беллашувлар ташкил этилмоқда. 

Хусусан, “Тўрақўрғон ИЭС” корхонаси касаба уюшмаси қўмитаси ҳамда Ёшлар иттифоқи бирламчи ташкилоти томонидан таъсис этилган “TURAKURGAN TPP CHESS CUP” кубоги учун ёшлар ўртасида шахмат мусобақаларининг ҳал қилувчи финал бахслари ташкил этилди. 

Станциянинг саккиз нафар ёш шахматчиси иштирок этган турнир швейцар тизимида ўтказилиб, ғолиб бўлганлар турнирнинг кейинги босқичига йўлланмага эга бўлди. Муросасиз ўтган ярим финал ўйинлари натижасида финал ўйини иштирокчилари ҳамда учинчи ўрин учун давогарлар аниқлаб олинди. 

Финал ўйинида ўзаро учрашган Ишлаб чиқариш-техника бўлими ходими Рустам Содиқов ва Гидротехника иншоотлари цехи ходими Машраббой Турғунов салкам бир соат давом этган ўйинда муросасиз кураш олиб бордилар. Қора доналар билан ўйнаган Рустам Содиқов ўйин якунида ғолибликни қўлга киритди ва “TURAKURGAN TPP CHESS CUP” кубоги соҳибига айланди. 

Совринли 3-ўринни станциянинг метрология бўлими вакили Қосимов Хуршиджон эгаллади. 

Мусобақа ташкилотчилари томонидан совринли ўринларни эгаллаган ёш шахматчиларга фахрий ёрлиқлар топширилди, ғолиб шахматчи, шунингдек турнирда иккинчи ва учинчи ўриннни эгаллаган ёш шахматчилар эсдалик совғалари билан тақдирландилар. 

-Бизнинг олдимизда ёшларни янада кўпроқ фаолликка, шу жумладан спорт мусобақалари, интеллектуал беллашувлар орқали жалб қилиш вазифаси турибди, чунки спорт билан шуғулланиш интизомни мустаҳкамлашга, ҳар бир шахснинг сиҳат-саломатлигида ва ривожланишида муҳим аҳамият касб этади. – дейди Тўрақўрғон ИЭС корхонаси Ёшлар иттифоқи бирламчи ташкилоти фаоли Саид Жамалов. - Келгуси ҳафтада эса ёшлар ўртасида “Фаол китобхон” танловини ўтказишга тайёргарлик кўрмоқдамиз.