Davlat dasturlari xarajatlari uchun 24,2 trillion so‘m ajratilishi belgilanmoqda

2025−2027 yillarga mo‘ljallangan Byudjetnoma loyihasi e’lon qilindi. Unga ko‘ra, 2025 yilda davlat dasturlari va tadbirlariga sarflanadigan xarajatlar oshirilishi rejalashtirilmoqda.

Maktablarda zarur sharoitlarni ta’minlash uchun mablag‘ ajratiladi

Ma’lum qilinishicha, ushbu xarajatlar 5,8 foiz yoki 1,33 trillion so‘mga — 22,9 trillion so‘mdan 24,24 trillion so‘mga (taxminan 1,9 milliard dollar), shu jumladan, ta’lim sohasidagi loyihalar bo‘yicha xarajatlarni 6,18 trillion so‘mgacha (+8,2 foiz) oshirish rejalashtirilgan.  

Birinchi sinf o‘quvchilariga o‘quv qurollari xarid qilish uchun 143,5 milliard so‘m, maktablarda yangi kompyuter sinflarini tashkil etishga 200 milliard so‘m, Maktabgacha va maktab ta’limi vazirligi jamg‘armasini shakllantirishga — 120 milliard so‘m, ta’lim sohasidagi islohotlarni qo‘llab-quvvatlash jamg‘armasiga — 250 milliard so‘m, 1500 nafar chet ellik o‘qituvchini taklif etishga — 250 milliard so‘m yo‘naltiriladi.  

Shuningdek, maktab darsliklarini yangilash uchun 1 trillion 300 milliard so‘m mablag‘ ajratish rejalashtirilgan. Shu bilan birga, maktab darsliklarini ijaraga olish uchun to‘lovni qaytarish rejalashtirilgan. 2−11-sinf o‘quvchilari uchun to‘lov har to‘plam uchun 80 ming so‘mni tashkil qilishi mumkin. Bu davlat byudjeti yukini taxminan 376 milliard so‘mga kamaytirishi kutilmoqda.  

Tibbiyotda bolalar va ayollar salomatligi uchun texnologik uskunalar sotib olinadi

2025 yilda sog‘liqni saqlash sohasidagi davlat dasturlariga 2,79 trillion so‘m yo‘naltirish rejalashtirilgan, bu 2024 yilga nisbatan 19,2 foiz yoki 450,8 milliard so‘mga ko‘proq.  

Tibbiy xizmatlar sifatining statsionar sharoitda tug‘ilish standartlariga to‘liq mos kelishini ta’minlash maqsadida tug‘uruq o‘rinlari sonini bosqichma-bosqich oshirishga — 134,1 milliard so‘m, onkologik, gematologik va immunologik kasalliklarga chalingan bolalarga tibbiy yordam ko‘rsatishni yaxshilash chora-tadbirlariga — 135 milliard so‘m ajratiladi.  

Xususan, Sirdaryo viloyati, Toshkent shahri va Qoraqalpog‘iston Respublikasidagi tibbiyot muassasalarini tibbiy asbob-uskunalar, kompyuterlar va boshqa texnik vositalar bilan jihozlash, shuningdek, mahalliy tarmoqqa ulash xarajatlariga — 30 milliard so‘m, ayollar o‘rtasida saraton kasalligiga qarshi kurashish tizimini takomillashtirish dasturiga — 33,5 milliard so‘m ajratilishi ko‘zda tutilgan.  

Dunyoning yetakchi klinikalarida qo‘llanadigan bolalar gematologiyasi va onkologiya bo‘limlarida diagnostika va davolash bo‘yicha klinik standartlar, protokollar va tavsiyalarni joriy etish xarajatlariga — 9,3 milliard so‘m, Islom sivilizatsiyasi markazi qo‘lyozma fondini qadimiy manbalar bilan to‘ldirish uchun — 5 milliard so‘m, 1000 nomdagi jahonga mashhur kitoblarni tarjima qilish, nashrga tayyorlash va nashr etishga — 12 milliard so‘m ajratilishi belgilangan.  

Nuroniy jamg‘armasi mablag‘larini shakllantirish uchun 504 milliard so‘m ajratiladi

2024−2026-yillarda respublikada aholi xonadonlarini ichimlik suvi bilan ta’minlash uchun suv ta’minoti tarmoqlarini qurishga — 50 milliard so‘m, 2024−2025-yillarda “O‘zsuvta’minot” obyektlaridagi nasoslarni energiya tejamkorlariga almashtirishga — 25 milliard so‘m, 1991 -yilgacha qurilgan ko‘p xonadonli uy-joy fondini pasportlashtirishga — 30 milliard so‘m ajratilishi ko‘zda tutilgan.  

O‘zbekiston faxriylarini ijtimoiy qo‘llab-quvvatlash Nuroniy jamg‘armasi mablag‘larini shakllantirish uchun 504 milliard so‘m, “Kambag‘allikdan farovonlik sari” dasturi bo‘yicha xarajatlar 900 milliard so‘mni tashkil etadi.  

Tibbiyotda orqa miya mushaklari atrofiyasi tashxisi qo‘yilgan bolalarga tibbiy-ijtimoiy yordam ko‘rsatish va ularni dori-darmonlar bilan bepul ta’minlash uchun mablag‘lar 151,2 milliard so‘mdan 250 milliard so‘mga (+65,3 foiz), iqtidorli va malakali tibbiyot mutaxassislarini qo‘llab-quvvatlash va ularni tibbiyot muassasalariga jalb etish uchun — 40 milliard so‘mdan 50 milliard so‘mgacha (+25 foiz), nefrologiya va gemodializ sohasiga ko‘maklashish uchun — 115 milliard so‘mdan 241,8 milliard so‘mgacha (2,1 baravar), bolalar va tug‘ish yoshidagi, homilador va emizikli ayollarni maxsus profilaktika vositalari bilan bepul ta’minlash uchun — 26,4 milliard so‘mdan 176 milliard so‘mgacha (6,7 barobar) oshiriladi.