Oʻzbekistonga nechta telefonni muammosiz olib kirish mumkin?

Oʻzbekistonga mobil telefonlarni olib kirish qatʼiy qoidalarga bo‘ysunadi va har bir chegarani kesib oʻtuvchi shaxs belgilangan normalarni bilishi kerak. Xo‘sh, qo‘shimcha muammosiz qancha telefon olib kirish mumkin?

Aniq cheklovlar

Mamlakatga kirish usuliga qarab, bojxona to‘lovlarisiz olib kirish mumkin bo‘lgan qurilmalar soniga aniq cheklovlar qo‘yilgan. Masalan, samolyotda uchib kelsangiz, ikki dona telefon olib kirishingiz mumkin, lekin piyoda yoki avtomobil bilan kirganingizda – faqat bitta.

Telefonlarni olib kirish qoidalari

Samolyotda: Agar siz samolyot orqali Oʻzbekistonga kirayotgan boʻlsangiz, bojxona toʻlovlarisiz ikki dona telefon olib kelishingiz mumkin.

Poyezd, avtomobil yoki piyoda: Agar yer usti transportida yoki piyoda kirayotgan boʻlsangiz, har olti oyda bir marta bitta telefonni bojxonadan o‘tkazishingiz mumkin.

Muhim cheklovlar va talablar

Qurilmalar sonidan tashqari, olib kirilayotgan tovarlar qiymatiga ham cheklov mavjud:

·       Samolyot — tovarlar summasi 2000 AQSh dollarigacha.

·       Poyezd — tovarlar 1000 AQSh dollarigacha.

·       Avtotransport va piyoda o‘tish — tovarlar 300 AQSh dollarigacha.

Telefonlarni ro‘yxatdan o‘tkazish va UzIMEI tizimi

Qurilmalar sonidan qatʼiy nazar, Oʻzbekistonga olib kirilgan barcha telefonlar yoʻlovchi bojxona deklaratsiyasida koʻrsatilishi kerak. Ushbu maʼlumotlar qurilmani UzIMEI tizimida majburiy ro‘yxatdan o‘tkazish uchun talab qilinadi — ushbu ro‘yxatga olinmasdan telefon mahalliy tarmoqlarda ishlamaydi.

30 foiz miqdorda bojxona to‘lovi

Agar telefonlar soni yoki qiymati belgilangan normalardan oshsa, ularni yashirmaslik tavsiya etiladi: deklaratsiyada ularni halol ko‘rsatgan ma’qul. Agar limit oshirilsa, UzIMEI tizimi qurilmani ro‘yxatdan o‘tkazishdan oldin qurilmaning qiymatidan 30 foiz miqdorida bojxona to‘lovini to‘lashni talab qiladi.

O‘zbekistonda telefon sotib olish va tekshirish

Agar siz O‘zbekistonda telefon sotib olayotgan bo‘lsangiz, ayniqsa shaxsiy sotuvchilardan, bozorlardan yoki onlayn-do‘konlardan, uni UzIMEI tizimida ro‘yxatdan o‘tganligini tekshirishni unutmang. Agar telefon tizimda ro‘yxatdan o‘tmagan bo‘lsa, bojxona to‘lovlarini o‘zingiz to‘lashingiz kerak bo‘ladi, bu esa xarid narxini sezilarli darajada oshirishi mumkin.

Tavsiyalar

Ortiqcha xarajatlar va bojxonadagi muammolardan qochish uchun quyidagi maslahatlarga rioya qiling:

·       Barcha qurilmalarni oldindan deklaratsiyada ko‘rsating.

·       O‘zbekistonda sotib olingan telefonlar ro‘yxatdan o‘tganligini tekshiring.

·       Zarur bo‘lganda O‘zbekiston Bojxona qo‘mitasining tun-u kun ishlovchi 11-08 qisqa raqamiga qo‘ng‘iroq qilib yordam oling.

Ushbu oddiy qoidalarga rioya qilib, qurilmalarni Oʻzbekistonga muammosiz va qoʻshimcha xarajatlarsiz olib kirishingiz mumkin.

Javobgarlik qanday?

O‘zbekiston Respublikasida bojxona chegarasi orqali tovarlarni yashirincha olib o‘tish qonunbuzarlik hisoblanadi va tegishli javobgarlikka sabab bo‘ladi. Bunday harakatlar uchun quyidagi javobgarlik turlari belgilangan:

Ma’muriy javobgarlik: Agar bojxona qoidabuzarligi ma’muriy huquqbuzarlik sifatida baholansa, jarima solinishi yoki tovarlar musodara qilinishi mumkin.

Jinoyat javobgarligi: Agar qoidabuzarlik jinoyat tarkibini tashkil etsa, O‘zbekiston Respublikasining Jinoyat kodeksiga muvofiq, jarima, ozodlikdan mahrum qilish yoki boshqa jazo choralari qo‘llanilishi mumkin.

Bojxona qoidalarini buzishning oldini olish va qonuniy tartibda tovarlarni olib o‘tish uchun bojxona organlari tomonidan belgilangan qoidalarga rioya qilish zarur. Bojxona to‘g‘risidagi qonunchilikni buzganlik uchun javobgarlik O‘zbekiston Respublikasining Bojxona kodeksida belgilangan.