Harbiy tavsiyanomaga ega bo‘lganlar uchun kvotalar tasdiqlandi

Oliy ta’lim muassasalariga o‘qish qabul qilish bo‘yicha harbiy tavsiyanomaga ega bo‘lganlar uchun respublika bo‘yicha jami 9745 ta qo‘shimcha kvota ajratildi. Bu haqda Bilim va malakalarni baholash agentligi ma’lum qildi.

Kvotalar taqsimlanishi

Qayd etilishicha, harbiy qism qo‘mondonligining besh foizli tavsiyanomasiga ega bo‘lgan abituriyentlarga kvotalar ta’lim shakllari kesimida quyidagicha taqsimlangan:

kunduzgi – 6400 ta (davlat granti - 1 742 ta, to‘lov-kontrakt - 4 658);

sirtqi – 2606 ta (to‘lov-kontrakt);

kechki – 458 ta (to‘lov-kontrakt);

masofaviy – 281 ta (to‘lov-kontrakt).

O‘tgan yili ajratilgan kvotalar

Eslatib o‘tamiz, o‘tgan 2023/2024-o‘quv yilida harbiy qism qo‘mondonligining tavsiyanomalariga ega bo‘lganlar uchun respublika bo‘yicha jami 9 506 ta qo‘shimcha kvota ajratilgan edi.

Unga ko‘ra, ta’lim shakllari kesimida:

kunduzgi ta’lim shakli uchun – 6 356 ta (davlat granti asosida - 1 746 ta, to‘lov-kontrakt asosida - 4 610);

sirtqi ta’lim shakli uchun – 2 453 ta (to‘lov-kontrakt asosida);

kechki ta’lim shakli uchun – 556 ta (to‘lov-kontrakt asosida);

masofaviy ta’lim shakli uchun – 141 ta (to‘lov-kontrakt asosida).

Abituriyent 56,7 balldan kam to‘plasa imtiyoz berilmaydi

Ma’lumot uchun harbiy tavsiyanomaga ega abituriyentlar uchun mazkur imtiyozli kvota faqat birinchi yo‘nalish uchun amal qiladi. Ikkinchi, uchinchi va boshqa yo‘nalishlar uchun hisobga olinmaydi. Imtiyozli kvota yo‘nalishlar kesimida emas, OTMlar kesimida berilgan. Ushbu imtiyozdan foydalanishda abituriyent grant uchun kamida 68 ball, kontrakt uchun kamida 56,7 ball to‘plagan bo‘lishi kerak. Undan kamroq ball olganlarga mazkur imtiyoz qo‘llanmaydi. Tavsiyanomali abituriyent o‘ziga o‘xshagan tavsiyanomalilar bilan saralashda ishtirok etadi. Agar saralashdan o‘tolmasa, o‘zi to‘plagan balli bo‘yicha umumiy tartibda barcha bilan bellashadi. Balli yetsa, grant yoki kontraktda o‘qishi mumkin. Avvalroq, Temurbeklar maktabi bitiruvchilariga qo‘shimcha kvotalar ajratilgani haqida xabar qilgan edik.