“Қора дайжест”: 2024 йил 2 февраль воқеалари

Автобус ҳайдовчисининг эҳтиётсизлиги сабаб икки йўловчи жароҳатланди

Ижтимоий тармоқларда 1 февраль Тошкент шаҳрида 52-сонли автобус ҳайдовчиси автобусни қўпол равишда бошқариши оқибатида йўловчи аёл ва унинг қизи тан жароҳати олгани ҳақида хабар тарқалди. Ҳолат юзасидан «Тошшаҳартрансхизмат» компанияси воқеа 1-автобус саройи филиалига бириктирилган 52-сонли автобус ҳайдовчиси А.А. томонидан содир этилганини қайд этди. Ҳайдовчи йўловчи ташиш қоидаларини бузган, ўзига бириктирилган автобусни эҳтиётсизлик билан бошқариб, йўловчилар автобусга чиқиб бўлмасидан автобус эшикларини ёпган. Оқибатда 2 нафар йўловчи (аёл ва унинг қизи) тан жароҳати олган. Ўзининг хизмат вазифасини суиистеъмол қилгани учун ҳайдовчи А.А. билан тузилган меҳнат шартномаси бекор қилинган.

Тошкентда ППХ ходимлари 13 ёшли болани машинага мажбурлаб ўтирғизди

Чилонзор туманида 13 ёшли боланинг ёнидан пиротехника воситаси чиққач, ППХ ходимлари уни машинага мажбурлаб ўтирғизди. Бола бошидан лат еган ва қаттиқ қўрққан. Икки ходимга ҳайфсан берилди. Болалар омбудсмани сўровига кўра ҳолатни прокуратура ўрганмоқда. Аниқланишича, ҳолат 2023 йил 22 декабрь куни Чилонзор тумани Чилонзор-3 мавзесида содир бўлган. ППХ ходимлари Ш. М. ва А.О. 2011 йилда туғилган К.П.да пиротехника воситалари борлигини аниқлаб, болани хизмат машинасига куч ишлатиб, мажбуран ўтқазишга уринган, шу тариқа унга нисбатан қўпол ва номақбул муносабатда бўлган. Оқибатда бола бош соҳасидан лат еган ва қаттиқ руҳий қўрқиш ҳолатига тушган.

Мажбурий бадал учун тўланган маблағларни ўзлаштирган МЧЖ аниқланди

Бош прокуратура ҳузуридаги Департаментнинг Яшнобод туман бўлими томонидан ўтказилган терговга қадар текширувда “K.T.” МЧЖ масъул шахслари 2022 йил ва 2023 йилнинг июль ойига қадар Тузель даҳасидаги кўп хонадонли уйларнинг мулкдорлари томонидан мажбурий бадал учун тўланган маблағларнинг 184 млн сўмини гўёки иш ҳақи сифатида ва 974,7 млн сўмини турли товар моддий бойликлар хариди учун сарфланганлиги ҳақида сохта ҳужжатларни расмийлаштириб, ушбу маблағларни ўзлаштириш йўли билан талон-торож қилганликлари аниқланган.

Ўсимлик дунёсига етказилган қарийб 1 миллиардли зарар

Қашқадарёнинг Касби туманида “To’palang HPD holding” МЧЖ масъуллари томонидан "Денов-Новқат" каналини реконструкция қилиш жараёнида канал қирғоғига экилган жами 150 та дарахт илдизлари билан қўпорилганлиги аниқланди. Бу билан “Республикада кўкаламзорлаштириш ишларини жадаллаштириш, дарахтлар муҳофазасини янада самарали ташкил этиш чора-тадбирлари тўғрисида”ги Фармони талаблари бузилган. Дарахтларни кесиш ёки кўчириб ўтқазиш бўйича амалдаги тартибларга риоя этилмаган ва мурожаат қилинмаган. Дарахтлар кесилиши натижасида ўсимлик дунёсига 1 миллиард 165 миллион 350 минг сўм зарар етказилганлиги маълум бўлди. Ҳужжатлар етказилган зарарни ундириш ҳамда айбдорларга қонуний чора кўриш мақсадида Қашқадарё вилояти прокуратурасига юборилди.

25 сотих ерни расмийлаштириб бериш эвазига 300 млн сўм сўраган шахслар ушланди

Сирдарё вилоятининг Оқолтин туманида яшовчи 34 ёшли фуқаро хусусий тадбиркор маиший хизмат кўрсатиш объектларини қуриб, фойдаланиши учун ажратилган 88 сотих ер майдонининг 26 сотихини ва унга туташ бўлган, туман ўрмон хўжалиги захирасидаги 20 сотих ер майдонини ҳам гўёки ўзига тегишли эканини айтиб, харидорга 46,5 минг долларга сотиш ҳамда кадастр тизимида ишловчи танишлари орқали ҳужжатларини расмийлаштириб беришни ваъда қилган.

Давлат хавфсизлик хизматининг Сирдарё вилояти бўйича бошқармаси ходимлари томонидан Иқтисодий жиноятларга қарши курашиш департаменти билан ҳамкорликда ўтказилган тезкор тадбирда у сўралган пулни олган вақтида ушланган.