Тошкент политехника музейида янги китоб тақдимоти бўлиб ўтди

Бугун, 10 март куни Тошкент политехника музейида Маданият ва санъатни ривожлантириш жамғармаси ва Латвиянинг ABC Design нашриёти ҳамкорлигида чоп этилган “Muzey qanday tuzilgan” китобининг тақдимоти бўлиб ўтди.

Тадбирда Маданият ва санъатни ривожлантириш жамғармаси Кенгаши раисининг ўринбосари Саида Мирзиёева, Мактабгача таълим вазири Агриппина Шин, Халқ таълими вазири Шерзод Шерматов ҳамда Маданият ва санъатни ривожлантириш жамғармаси ижрочи директори Гаянэ Умеровалар сўзга чиқиб, ўзбек тилига мослаштирилган болалар китобининг янги таҳрири ҳақида ўз фикрларини билдиришди.

“Эътиборингизга кичик бўлсад-да ўзига хос лойиҳани тақдим қилар эканман, ҳар бир ота-она учун ўз фарзандида маданий қадриятларга бўлган қизиқишни ўғотиш муҳим аҳамиятга эга эканини таъкидлаб ўтмоқчиман. Ҳозирда замонавий технологиялар қуршовида яшаганимиз ҳолда фарзандларимизга музейлар ва маданий ёдгорликлар ҳақидаги билимларни ўргатиш тобора қийинлашиб боряпти. Бугун сизларга таништирмоқчи бўлган китоб эса болаларнинг бу борадаги билими ва қизиқишларини оширишга қаратилган”, деди Саида Мирзиёева.

Мазкур энциклопедияда иллюстрациялар ва топишмоқлар бўлиб, улар орқали болаларга турли хил фойдали маълумотлар етказилади. Китобни ўзбек тилида қайта чоп этиш орқали ёш авлодни музейларга ташриф буюриб, тарихни ўрганишга чорлаш, улар фаолияти ҳақида тўлиқроқ маълумот бериш мақсад қилинган.

Шунингдек, Халқ таълими вазири Шерзод Шерматов ҳам китоб ҳақида ижобий фикрдалигини билдириб, у болаларни санъат асарларига бўлган муносабатини яхши томонга ўзгартиришини алоҳида қайд этди.

“Muzey qanday tuzilgan” китобининг ўзбек тилидаги мослаштирилган таҳририга И.В. Савицкий музейининг коллекциясидан Александр Николаев (Уста Мўмин), Виктор Уфимсев, Александр Шевченко, Николай Карахан, Евгений Лисенко, Александр Волков каби машҳур рассомларнинг асарлари киритилган.

Маълумот учун, мазкур китоб Моравия галереяси (Брно, Чехия)нинг ташаббуси билан биринчи марта нашр қилинган бўлиб, китоб Болоняда ўтказиладиган халқаро болалар китоби ярмаркасида ғолиб бўлган.