O‘zbekistonda pora bergan shaxs ham jazolanadimi?
Sog‘liqni saqlash vaziri vazifasini bajaruvchi Asilbek Xudoyorov korrupsiya masalasi bo‘yicha fikrlarini bayon qildi.
2 daqiqa o‘qiladi
O‘zbekistonda korrupsiyaga tasnif berilganda, porani olgan ham, bergan ham jazolanadi. Ammo aksariyat holatlarda porani bergan odam jazolanmayapti. Sog‘liqni saqlash vaziri vazifasini bajaruvchi Asilbek Xudoyorov korrupsiya masalasi bo‘yicha fikrlarini bayon qildi.
Sog‘liqni saqlash vazirligi korrupsiyaga qarshi kurashishga tayyor
Mulozim korrupsiya masalasiga Ijtimoiy himoya milliy agentligida “Nogironlikni belgilashning samarali mexanizmlari hamda tibbiy-ijtimoiy ekspertiza xizmati tizimini takomillashtirish” mavzusida o‘tkazilgan seminarda to‘xtaldi. Uning so‘zlariga ko‘ra, Sog‘liqni saqlash vazirligi korrupsiyaga qarshi kurashishga tayyor.
Bizda xohish juda kuchli
“Birinchi o‘rinda, rahbariyatda, ya’ni har bir tizim boshida turganlarning o‘zida va jamoasida korrupsiyaga qarshi kurashish bo‘yicha xohish bo‘lishi kerak. Men sizga va’da beraman, Sog‘liqni saqlash vazirligi markaziy apparatida va o‘ylaymanki, Ijtimoiy himoya milliy agentligida ham korrupsiyaga yo‘l qo‘ymaslik uchun xohish juda kuchli”, dedi Xudoyorov.
Korrupsiyaga yo‘l qo‘ymaslik qanday omillarga bog‘liq?
Uning ta’kidlashicha, korrupsiyaga yo‘l qo‘ymaslik bir necha omillarga bog‘liq.
“Korrupsiyaga yo‘l qo‘ymaslik tarbiyaga bog‘liq, qonundan qanchalik qo‘rqishga va qonunga amalga qilishga bog‘liq. Asosiysi, mening ishimda prinsip bor: xodim korrupsiyaga aralashmasligi, vazifasini to‘liq bajarishi uchun [qilayotgan] ishi o‘ziga yoqishi va o‘sha ishni yo‘qotib qo‘yishdan qo‘rqishi kerak. Biz esa xodimlarga maosh tomondan ham, boshqa tomondan ham sharoit yaratishimiz, ularni asossiz ayblashga bormasligimiz kerak, o‘shanda u ishini vijdonan bajaradi”, dedi vazirlik rahbari.
Uning ta’kidlashicha, nafaqat pora olgan, balki bergan shaxslarni ham jazolanishi kerakligini aholiga OAV orqali ko‘proq tushuntirish lozim.
