Maymun chechagi bo‘yicha favqulodda holat e’lon qilinishi mumkin

Jahon sog‘liqni saqlash tashkiloti maymun chechagi epidemiyasi bo‘yicha favqulodda vaziyatlar qo‘mitasi yig‘ilishini o‘tkazadi. Bu haqda SSV xabar bermoqda.

26 ta epidemiya o‘choqlariga aylangan mamlakatlar

Keyingi oylarda dunyoda mpox (maymun chechagi) virusi yana faollashgan. Epidemiya o‘choqlari aniqlangan mamlakatlar soni — 26 ta. Kasallanish ko‘rsatkichlari Afrika, Yevropa, Janubiy va Shimoliy Amerika mintaqalarida, ayniqsa, yuqori.

O‘lim darajasi 10 foizga oshgan

Xastalikning yangi shtammidan Kongo Demokratik Respublikasi aholisi eng ko‘p aziyat chekyapti. Ular orasida bolalar ham ko‘p. Shu tufayli mamlakatda kichik yoshli bemorlar o‘rtasida o‘lim darajasi 10 foiz oshgan.

Xavotirli jihati, epidemiya boshqa mintaqalar bo‘ylab ham tarqalishi mumkin. Jahon sog‘liqni saqlash tashkiloti esa buning oldini olish harakatida.

Bu sog‘liqni saqlash sohasida favqulodda holatga aylanishi mumkin

Xususan, kecha JSST rahbari Tedros Gebreyesus mazkur xavf omili tufayli tashkilotning xalqaro mustaqil ekspertlardan tarkib topgan favqulodda vaziyatlar bo‘yicha qo‘mitasi yig‘ilishini chaqirishga qaror qildi.

Ushbu yig‘ilishda epidemiyaning global xavf darajasi tahlil qilinib, uni sog‘liqni saqlash sohasida favqulodda holat, deb e’lon qilish masalasi ko‘rib chiqiladi.

Ma’lumot uchun, maymun chechagi epidemiyasi bo‘yicha e’lon qilingan so‘nggi favqulodda holat 2022-yilning iyulidan 2023-yil may oyigacha davom etgandi.