Bolalar bog‘chalarida nimalar bo‘lyapti?

O‘zbekiston Konstitutsiyasida bolalar davlat tomonidan himoya qilinishi aniq belgilab qo‘yilgan. Biroq so‘nggi paytlarda bog‘chalarda sodir bo‘layotgan voqealar bunday kafolatlar faqat qog‘ozda qolayotganini ko‘rsatmoqda. Ayrim xususiy muassasalarda bolalar qiynoqqa solinayotgani, nazoratning esa yetarlicha yo‘qligi jamoatchilikni qattiq tashvishga solmoqda. Ota-onalar faqat izoh emas, balki aniq choralar ko‘rilishini talab qilmoqda. 

 Bog‘chalardagi zo‘ravonlik – tizimli muammo 

Senatorlar bog‘chalarda bolalarga nisbatan zo‘ravonlik holatlari ortib borayotgani haqida jiddiy xavotir bildirdi. Ularning fikricha, xususiy bog‘chalarda nazorat sust.  

O‘zbekiston Konstitutsiyasining 26-moddasiga ko‘ra, hech kim qiynoqqa solinishi, zo‘ravonlik yoki shafqatsiz munosabatga duchor bo‘lishi mumkin emas. Shuningdek, 78-moddada davlat bolalar himoyasini kafolatlaydi. Biroq Toshkentdagi “Tanzilandiya” xususiy bog‘chasida tarbiyachilar bolalarga nisbatan zo‘ravonlik qilgani aniqlangan. Yana bir holatda, Yunusobod tumanidagi “First Daycare” bog‘chasida bola ovqat yeyishdan bosh tortgani uchun stulga skotch bilan bog‘lab qo‘yilgan.  

Bu faqat oshkor bo‘lgan holatlar. Bunday qo‘pol munosabat boshqa bog‘chalarda ham yo‘qligiga kim kafolat bera oladi?  

 Bog‘chalarda nazorat bormi? 

 Rasmiy ma’lumotlarga ko‘ra, O‘zbekistonda 31 139 ta xususiy va 6 919 ta davlat bog‘chasi mavjud. Biroq ularning barchasi qanday nazorat qilinayotgani ochiq savol ostida qolmoqda.  

Senator B. Abdullayev maktabgacha va maktab ta’limi vaziridan quyidagi savollarga javob berishni talab qildi:  

Nega bolalarga nisbatan zo‘ravonlik holatlari tobora ko‘paymoqda?  

Bunday hodisalar oldini olish uchun qanday choralar ko‘rilmoqda?  

Xususiy va davlat bog‘chalaridagi sharoitlar qanday nazorat qilinmoqda?  

 Ota-onalar javob kutmoqda 

 Jamoatchilik bu holatlarga jiddiy e’tibor qaratishni va zo‘ravonlikka aloqador shaxslarning jazolanishini talab qilmoqda. Oddiy izoh bilan cheklanib bo‘lmaydi – ota-onalar qattiq nazorat, qat’iy tekshiruvlar va bolalar xavfsizligini ta’minlaydigan mustaqil nazorat tizimi joriy etilishini istashmoqda.