Yoshlar iqlim o‘zgarishiga qarshi kurashda birlashmoqda

Bugun, 11-noyabr kuni BMTning “COP-29” Iqlim konferensiyasi doirasida yosh ishtirokchilar uchun o‘quv ekologik oromgohi boshlandi. Tadbirda “Eco-schools Uzbekistan” loyihasi va “Young Climate Champions” hamjamiyati faollari, shuningdek, Markaziy Osiyo mamlakatlari, Ozarbayjon, Vengriya va Turkiyadan kelgan yosh yetakchilar ishtirok etadi.

Asosiy maqsad —“Yo‘l xaritasi”ni yaratish

Oromgoh ishtirokchilarning asosiy vazifasi — “Yo‘l xaritasi” ni ishlab chiqish bo‘lib, u 2024—2030-yillarda barqaror rivojlanish madaniyatini ilgari surish va bolalar hamda yoshlarni iqlim kun tartibiga jalb qilish bo‘yicha Xalqaro strategiyani amalga oshirishga qaratilgan kelgusi yil uchun harakatlar rejasini o‘z ichiga oladi. Shuningdek, oromgoh turli mamlakatlardan kelgan yoshlarga tajriba almashish va barqaror rivojlanish bo‘yicha eng yaxshi amaliyotlarni o‘rganish imkonini beradi. Bundan tashqari, ishtirokchilar o‘z mintaqalarida ekologik loyihalarni amalga oshirish uchun zarur bo‘lgan qimmatli bilim va ko‘nikmalarni oladilar. Ishlab chiqilgan “Yo‘l xaritasi” global iqlim muammolarini hal etishga yo‘naltirilgan kelgusi tashabbuslarning asosi bo‘lib xizmat qiladi.

Loyiha kutilmasi

Tashkilotchilar yosh faollarning birgalikdagi sa’y-harakatlari milliy va mintaqaviy darajada amalga oshiriladigan samarali strategiyalar yaratilishiga olib kelishiga umid qilmoqda. Bu barqaror rivojlanish maqsadlariga erishish va kelajak avlodlar uchun sayyoramizni saqlab qolish yo‘lidagi muhim qadamlardan biridir.