O‘zbekiston va Qozog‘iston 7 mlrd. dollarlik loyihalar va birgalikda ipak ishlab chiqarishga kelishib oldi
Qozog‘iston-O‘zbekiston biznes-forumi doirasida ikki mamlakat bosh vazirlari o‘rinbosarlari ishtirokida ikki tomonlama uchrashuv bo‘lib o‘tdi.
2 daqiqa o‘qiladi
Bular haqida Qozog‘iston hukumati matbuot xizmati xabar qilgan.
Milliardlik investitsiyalar
Qozog‘iston-O‘zbekiston biznes-forumi doirasida ikki mamlakat bosh vazirlari o‘rinbosarlari Serik Jumangarin va Jamshid Xodjayev ishtirokida ikki tomonlama uchrashuv bo‘lib o‘tdi.
Unda umumiy qiymati 4,4 milliard dollarlik 34 ta investitsiya loyihasi va 2,6 milliard dollarlik 7 ta savdo shartnomasini birgalikda amalga oshirishga kelishib olindi.
Investitsiya loyihalari energetika, konchilik va geologiya, transport, kimyo sanoati, qurilish, elektrotexnika, mashinasozlik, farmatsevtika kabi sohalar uchun mo‘ljallangan.
Qishloq xo‘jaligi ulushi
Loyihalarning eng katta qismi qishloq xo‘jaligiga to‘g‘ri keladi.
Tomonlar Qozog‘istonda qishloq xo‘jaligi mahsulotlarini birgalikda yetishtirish hamda g‘alla va sholini chuqur qayta ishlash, Turkiston viloyatida ipak mahsulotlari ishlab chiqarish, qadoqlash materiallari ishlab chiqaruvchi korxona tashkil etish va boshqa masalalar bo‘yicha kelishuvlarga erishildi.
Shuningdek, Mangistau viloyatida qoramol terisini qabul qilish va qayta ishlash bo‘yicha qo‘shma korxona tashkil etishga qaror qilindi.
"Bittasi yaxshi, ikkitasi undan ham yaxshi"
Mazkur loyihalarning amalga oshirilishi ikki davlatning sarmoyaviy va savdo salohiyatidan samarali foydalanish imkonini beradi. Bu esa ikki davlat rahbarlari maqsadi bo‘lgan o‘zaro tovar ayirboshlash hajmini 10 milliard dollarga yetkazishga xizmat qiladi.
"Qozog‘iston – O‘zbekiston" biznes-forumi haqida
"Qozog‘iston – O‘zbekiston" biznes-forumida ikki mamlakat milliy kompaniyalari, ishbilarmon doiralari va davlat organlarining 450 nafardan ortiq vakillari ishtirok etdi. O‘zbekiston Qozog‘istonning eng yirik savdo hamkorlaridan biri bo‘lib, 2023-yil yakuni bo‘yicha u 7-o‘rinni egalladi.
Mamlakatning Markaziy Osiyo mamlakatlari bilan umumiy savdo aylanmasining 57 foizdan ortig‘i O‘zbekiston bilan tovar ayirboshlash hissasiga to‘g‘ri keladi.
