O‘zbekiston OTJ Parijdagi oxirgi o‘yinda umidi so‘nmagan Dominikan Respublikasiga qarshi maydonga tushadi

Bugun, 30-iyul kuni Parij-2024 yozgi Olimpiya o‘yinlari doirasida Timur Kapadze boshchiligidagi O‘zbekiston OTJ "S" guruhidagi so‘nggi 3-tur uchrashuvini o‘tkazadi. 

Dominikanda umid bor

Bugungi raqib Dominikan Respublikasi. Raqibda O‘zbekistondan farqli keyingi bosqichga chiqish imkoniyati hali hamon saqlanib turibdi. Sababi, Dominikan Respublikasi 1-turda Misr bilan 0:0 hisobida durang o‘ynadi. Jamoa 2-turda Ispaniya terma jamoasiga 1:3 hisobida imkoniyatni boy berdi. Ushbu turdagi Misr va Ispaniya o‘rtasidagi o‘yin Dominikan Respublikasining musobaqadagi taqdirini belgilab beradi. 

Imkoniyat qolmagan

Yuqorida ta’kidlaganimizdek, O‘zbekiston OTJ o‘yinda qanday natija qayd etishidan qat’iy nazar, musobaqa bilan xayrlashadi. Afsuski, jamoamiz avvalroq Ispaniya jamoasiga 1:2 hisobida, so‘ngra Misr terma jamoasiga 0:1 ko‘rinishida imkoniyatni boy bergandi. Shu sababli, mamlakatimiz vakillarida keyingi bosqichga chiqish uchun umuman imkoniyat qolmagan. Kapadze shogirdlari uchun ushbu o‘yin so‘nggi bahs vazifasini o‘taydi. Ma’lumot uchun, ushbu bahs Toshkent vaqti bilan soat 18:00 da boshlanadi. Parij Olimpiadasidagi futbol musobaqalari esa 9-avgustga qadar davom etadi.