Украина шакар заводи Ўзбекистонга шакар экспорт қилмоқчи

Украинанинг “Оржицкий сахарный завод” МЧЖ шакар заводи Ўзбекистонга экспорт қилмоқчи. Мазкур таклиф Республика товар-хом ашё биржаси томонидан тўла қўллаб-қувватланган. Бу ҳақида биржа ахборот хизмати хабар бермоқда.

Маълум қилинишича, 2020 йилнинг 4 ноябрь куни Украина Ташқи ишлар вазирлиги, Украинанинг Ўзбекистондаги ҳамда Ўзбекистоннинг Украинадаги элчихоналари билан ҳамкорликда Украинанинг Миллий шакар, ёғ, буғдой ва ун ишлаб чиқарувчилар уюшмасига аъзо корхоналар билан zoom орқали видеоанжуман ўтказилган.

Шакар, ўсимлик ёғи, буғдой ва ун маҳсулотларини биржа механизмларидан фойдаланган ҳолда импорт қилиш орқали мамлакатимизда озиқ-овқат хавфсизлигини таъминлаш ва ички бозорда нарх-наво барқарорлигини сақлаш мақсадида ўтказилгани айтилаётган видеоанжуманда Украинаниниг 16 та йирик уюшма ва ишлаб чиқарувчилари («Мукомолы Украины» Иттифоқи, Украина шакар ишлаб чиқарувчилари уюшмаси, «Украинский национальный продукт» МЧЖ, «Фемели Трейд Групп» МЧЖ, «Анеста» МЧЖ, «Зернари» МЧЖ, «ТРЕЙД-ВВ» МЧЖ ва бошқалар) ҳамда Украинанинг давлат озиқ-овқат ва буғдой корпорацияси, “Трастбанк” ХАБ вакиллари, биржа ходимлари ва брокерлари иштирок этишган.

Анжуманда томонлар ўзаро манфаатли ҳамкорлик юзасидан аниқ таклифлари билан чиқишган. Хусусан, “Оржицкий сахарный завод” МЧЖ (Полтава, Украина) вакиллари шакар маҳсулотини биржа савдолари орқали Ўзбекистонга экспорт қилиш таклифини берган. Мазкур таклиф биржа томонидан тўла қўллаб-қувватланди ва уни видеоанжумандан сўнг тезкор амалиётда татбиқ этиш бўйича тегишли кўрсатмалар берилган.

Эслатиб ўтамиз, аввалроқ жорий йилнинг июль ойида Ўзбекистонда мавжуд шакар ишлаб чиқарувчи заводлар – “Хоразм шакар” ва “Ангрен шакар” заводлари ёпилганди.