Xitoyning eng kuchli elektromobil brendi qaysi? – TOP-5

Elektromobillar butun dunyo bo‘ylab yangi avlod harakatlanish vositalari sifatida tez sur’atlar bilan rivojlanib bormoqda va elektr transporti ilgari hech qachon bunday yuqori o‘sish tezligiga ega bo‘lmagan. Xalqaro energetika agentligining ma’lumotlariga ko‘ra, 2024-yilda elektromobillar neftga bo‘lgan talabni kuniga 1,3 million barrelga qisqartirgan va bu ko‘rsatkich yillik 30% o‘sishni ko‘rsatgan. Xitoyning elektromobil ishlab chiqaruvchilari esa bu o‘sishga eng katta hissa qo‘shgan.

Bir necha yil ichida bir qator Xitoy kompaniyalari innovatsion ishlanmalari va arzon narxlar orqali uzoq yillar davomida bozorga hukmronlik qilgan G‘arb avtomobil ishlab chiqaruvchilarini ortda qoldirishga muvaffaq bo‘ldi. Masalan, BYD kompaniyasini ko‘rib chiqaylik. 2025-yilda global sof elektr transport vositalari savdosi bo‘yicha Tesla’ni ortda qoldirgan.

Quyida Xitoyning eng kuchli TOP-5 elektromobil brendi bilan tanishing.

BYD

BYD hozirda Xitoyning eng yirik elektromobil ishlab chiqaruvchisi hisoblanadi. Kompaniya 1995-yilda batareyalar ishlab chiqarishni boshlagan bo‘lsa-da, bugungi kunda Tesla bilan teng hajmdagi ishlab chiqarishni amalga oshirmoqda. BYD’ning ajralib turadigan xususiyati — to‘liq vertikal integratsiyaga asoslangan ishlab chiqarish jarayonidir. Kompaniya o‘z avtomobillaridagi aksariyat qismlarni, jumladan Blade Battery akkumulyatorlaridan tortib elektron qismlargacha o‘zi ishlab chiqaradi. Bu usul ishlab chiqarish narxini sezilarli darajada pasaytiradi va BYD’ga global bozorlar uchun agressiv narxlar taklif qilish imkonini beradi.

Geely

Geely Xitoy elektromobil bozorida boshqacha strategiyani tanlagan. Kompaniya Zeekr, Geometry va boshqa sub-brendlar orqali turli segmentlarga mos avtomobillarni taklif etadi. Bu yondashuv Geely’ga deyarli barcha narx kategoriyalarida o‘z o‘rnini mustahkamlash imkonini yaratmoqda. Shuningdek, Geely Volvo, Polestar va Mercedes-Benz’ning bir qator ulushlariga ega bo‘lishi tufayli global tajribadan keng foydalanmoqda. 2024-yilda kompaniya jahon bozorida 2,7 foiz ulushga erishib, Volkswagen’ni ortda qoldirishga muvaffaq bo‘ldi.

NIO

NIO elektromobillarni faqat transport vositasi sifatida emas, balki to‘liq ekotizim sifatida taklif qilayotgan innovatsion kompaniyalardan biridir. Uning asosiy afzalligi batareya almashtirish texnologiyasi asosida ishlovchi Power Swap tarmog‘idir. 2025-yil oxiriga kelib Xitoyda 3 400 dan ortiq, Yevropada 59 va BAAda 1 ta stansiya faoliyat yuritmoqda. NIO avtomobillari NOMI sun’iy intellekt yordamchisi bilan jihozlangan bo‘lib, foydalanuvchi odatlarini o‘rganadi va tabiiy muloqotda buyruqlarni bajaradi. Bundan tashqari, kompaniya o‘z mijozlari uchun NIO House klublari, NIO Life brendi va hatto o‘z smartfonlarini ishlab chiqmoqda. Bu yondashuv NIO’ni oddiy avtomobil ishlab chiqaruvchisidan ko‘ra kengroq texnologik ekotizimga aylantiradi.

XPeng

XPeng kompaniyasi sun’iy intellektni avtomobil texnologiyasiga chuqur integratsiya qilgani bilan mashhur. Uning XOS 5.1.0 operatsion tizimi, XNet va XBrain kabi avtonom haydash modullari hamda XPeng Turing 40 yadroli chipi elektromobil bozorida yangi standartlar yaratmoqda. Yaqinda XPeng Xitoyda atigi 17 ming dollardan boshlanadigan Mona M03 modelini taqdim etdi, bu esa aqlli haydash texnologiyalari bilan jihozlangan eng arzon elektromobillardan biri sifatida katta e’tibor qozondi.

Li Auto

Li Auto esa to‘liq elektromobillar bilan emas, balki benzinli generator orqali batareyani uzluksiz quvvatlab turuvchi range-extender uslubidagi krossoverlari bilan mashhur. Bu texnologiya ayniqsa elektr zaryadlash infratuzilmasi rivojlanmagan hududlar uchun juda qulaydir. Li Auto 2024-yilda 500 mingdan ortiq avtomobil yetkazib berdi va 2025-yil sentabriga kelib umumiy yetkazib berish miqdori 1,4 millionga yetdi. Kompaniya xaridorlariga to‘liq elektromobil hayotiga o‘tishdan oldin qulay o‘tish imkoniyatini taqdim etmoqda.