6 milliard dollarlik xayriya soyada qoldi: Tramp bilan uchrashgan milliarderning rafiqasi nega shov-shuvga sabab bo‘ldi?

Amerikalik milliarder Maykl Dellning rafiqasi Syuzan Dell Oq uyda Donald Tramp bilan uchrashganidan keyin internetda shov-shuv ko‘tarildi. Aslida uchrashuv millionlab bolalar uchun ajratilayotgan 6,25 milliard dollarlik mablag‘ga bag‘ishlangan edi. Ammo ijtimoiy tarmoqlarda Syuzanning nutqidan ko‘ra uning yuzi va harakatlari ko‘proq muhokama qilindi. Hatto ayrimlar uni “o‘zga sayyoralik” va robotga o‘xshatmoqda.

Oq uyda 6 milliard dollarlik tashabbus muhokama qilindi

7-oktyabr kuni AQSh prezidenti Donald Tramp Oval kabinetda Dell Technologies asoschisi Maykl Dell va uning rafiqasi Syuzan Dellni qabul qildi.

Uchrashuv amerikalik bolalar uchun tashkil etilgan “Trump Accounts” jamg‘arma dasturiga bag‘ishlandi. Dastur orqali belgilangan talablarga javob beradigan bolalar nomiga investitsiya hisoblari ochiladi. Davlat tegishli mezonlarga mos keladigan har bir bola hisobiga 1 000 dollar kiritadi.

Maykl va Syuzan Dell jamg‘armasi 2025-yil oxirida ushbu tashabbusga 6,25 milliard dollar ajratish majburiyatini olgan. Boshqa xabarlarda kamida 25 million nafar bolani qamrab olish uchun 6,5 milliard dollar ajratish rejasi ham tilga olingan.

Uchrashuvda Tramp yana millionlab bolalarni dasturga avtomatik ro‘yxatdan o‘tkazish rejasini e’lon qildi.

Syuzan Dell ham Oq uyda nutq so‘zlab, mamlakatdagi har bir bolaga ushbu jamg‘arma hisoblari aynan ular uchun tashkil etilganini va ularning kelajagiga ishonishini ta’kidladi.

“Odammi yoki robot?” — internetda bahs boshlandi

Syuzan Dellning Oq uydagi nutqi aks etgan videolar tarqalgach, ijtimoiy tarmoqlarda uning tashqi ko‘rinishi haqida turli izohlar paydo bo‘ldi.

Ayrim foydalanuvchilarga uning yuz ifodasi va harakatlari g‘ayritabiiy tuyulgan. Shu sababli uni robot yoki “o‘zga sayyoralik”ka o‘xshatganlar ham bo‘ldi.

Hatto Syuzanning eski va yangi suratlari ham yonma-yon qo‘yib, yuz tuzilishi va bo‘yanishidagi farqlarni muhokama qilayotganlar ham bo‘ldi.

“Nahotki bu o‘sha ayol bo‘lsa?” mazmunidagi izohlar ko‘paydi. Ayrimlar Syuzanning avvalgi ko‘rinishini yoqtirganini, boshqalar esa uning tabiiy qarish o‘rniga kosmetik muolajalarga murojaat qilgan bo‘lishi mumkinligini taxmin qildi.

Internetda uning qiyofasiga nisbatan “Mar-a-Lago face” iborasi ham ishlatildi. Bu atama kuchli bo‘yanish va kosmetik muolajalar bilan bog‘liq, ayrim konservativ siyosiy doiralardagi ayollarga xos deb tasvirlanadigan tashqi ko‘rinishni anglatadi.

Plastik operatsiyami yoki oddiy bo‘yanish?

Syuzan Dellning suratlari kosmetik muolajalar haqidagi taxminlarni ham kuchaytirdi. Mirror US nashri Cosmedics klinikalari tibbiy direktori, doktor Ross Perridan uning tashqi ko‘rinishidagi o‘zgarishlar yuzasidan fikr olgan.

Suratlarda jag‘ va yuzning o‘rta qismidagi teri tarangroq ko‘ringani uchun yuz terisini tortish operatsiyasi ehtimoli tilga olingan. Yuqori qovoqdagi ortiqcha terini olib tashlash — blefaroplastika ham ko‘zlarni kattaroq va ochiqroq ko‘rsatishi mumkin.

Botoks yuzdagi ajinlarni kamaytiradi, fillerlar esa yonoq va ko‘z ostidagi hajmni tiklashga yordam beradi. Bunday inʼeksiyalar haddan tashqari ko‘p qo‘llansa, odam doim hayratlangandek ko‘rinib qolishi mumkin.

AQShda yuz terisini tortish operatsiyasi 40 ming dollargacha, yuqori qovoq operatsiyasi 8 ming dollar atrofida, botoks 300–800 dollar, fillerlar esa 600–1 500 dollar turishi mumkin. Narxlar klinika va muolaja turiga qarab farqlanadi.

Biroq Syuzan Dell plastik operatsiya qildirganini tasdiqlamagan. Ross Perri ham uni shaxsan tekshirmagan. Yorug‘lik, bo‘yanish, kamera burchagi, vazn yo‘qotish yoki vaqtinchalik shish ham suratdagi qiyofani o‘zgartirishi mumkin. Shu bois kosmetik operatsiyalar haqidagi gaplar hozircha taxminlardan iborat.

Epshteyn hujjatlari va ayollarning tashqi ko‘rinishi haqidagi bahslar

Oq uydagi uchrashuv fonida Maykl Dellning ismi Jeffrey Epshteyn bilan bog‘liq hujjatlarda uchrashi haqidagi ma’lumot ham e’tiborni tortdi. Biroq hujjatlarda biror kishining ismi tilga olinishi uning noqonuniy ishlarga aloqadorligini yoki aybdorligini anglatmaydi. Bu ma’lumotning aynan qanday holatga tegishli ekani keltirilmagan.

Syuzan Dell atrofidagi bahslar esa jamoatchilik e’tibori ayollarning faoliyatidan ko‘ra ko‘pincha ularning tashqi ko‘rinishiga qaratilishini yana bir bor ko‘rsatdi.

2024-yilda millionlab ijtimoiy tarmoq postlari o‘rganilgan tadqiqotda ham siyosat va jamoat hayotidagi ayollar ko‘proq tashqi ko‘rinishi, erkaklar esa qobiliyati va malakasi orqali muhokama qilinishi qayd etilgan.

Melaniya Trampning tashqi ko‘rinishi, Hillari Klintonning kostyum-shimlari va soch turmagi, Kamala Harrisning prezidentlik kampaniyasi davridagi qiyofasi ham ko‘p bora muhokamalarga sabab bo‘lgan.

Erkak siyosatchilar ham ba’zan kiyimi uchun e’tibor markaziga tushadi. Yaqinda Donald Trampning kostyumidagi yorliq uning qimmat kiyim kiyishi bilan bog‘liq bahslarga sabab bo‘lgan. Ammo bu muhokamalar ko‘proq uning kiyinish uslubi siyosiy bayonotlariga qanchalik mos kelishi haqida edi.