Ikkilamchi avtomobil bozorida narxlar tushib bormoqda. Eng katta pasayish qaysi modellarda?

Makroiqtisodiy va hududiy tadqiqotlar instituti (MHTI) tomonidan o‘tkazilgan tahlillar natijalariga ko‘ra, 2025-yil yanvar oyida O‘zbekiston ikkilamchi avtomobil bozorida narxlarning pasayishi kuzatilgan. Bu pasayish, asosan, mahalliy avtomobillar, elektromobillar va ayrim xorijiy brendlarning modellari orasida sezilarli bo‘ldi.

Mahalliy ommabop avtomobillar narxi pasaydi 

Yanvar oyida mahalliy ommabop avtomobillar narxi pasayishda davom etdi. Onix, Lacetti, Cobalt, Nexia, Spark va Damas modellari arzonlashdi. Onix avtomobilining kam foydalanilgan variantlari 2,4% ga arzonlashib 14 350 dollardan 14 000 dollarga tushgan bo‘lsa, ko‘p foydalanilganlari 1,5% ga pasayib 13 000 dollardan 12 800 dollarga tushdi.  

Lacetti avtomobili narxida ham pasayish kuzatilib, kam foydalanilganlari 0,7% ga, o‘rtacha foydalanilganlari 1,4% ga, ko‘p foydalanilganlari esa 1,7% ga arzonlashdi. Cobalt modelida ham shunga o‘xshash dinamikalar kuzatilib, kam foydalanilgan avtomobillar 1,4%, o‘rtacha foydalanilganlari 2,4%, ko‘p foydalanilganlari esa 1,7% ga arzonlashdi.  

Nexia narxida ham tushish kuzatilib, o‘rtacha foydalanilganlari 1,8%, ko‘p foydalanilganlari esa 0,3% ga arzonlashdi. Spark modelining o‘rtacha foydalanilgan variantlari 1%, ko‘p foydalanilganlari esa 1,1% ga pasaydi. Damas avtomobili bozorida esa eng katta narx pasayishi kuzatildi, kam foydalanilganlari 0,5%, o‘rtacha foydalanilganlari 1,4%, ko‘p foydalanilganlari esa 4,1% ga arzonlashdi.  

Mahalliy lyuks avtomobillar narxlari qanday o‘zgardi?  

Yanvar oyida mahalliy lyuks avtomobillar orasida Malibu, Equinox va Tracker modellari narxi pasaydi, ammo ayrim kam foydalanilgan variantlarda narx oshishi kuzatildi. Malibu modelining o‘rtacha foydalanilganlari 2,1%, ko‘p foydalanilganlari esa 1,6% ga arzonlashdi, shu bilan birga kam foydalanilgan variantlari 1,2% ga qimmatlashdi.  

Equinox modelining o‘rtacha foydalanilganlari 1,6% ga arzonlashgan bo‘lsa, ko‘p foydalanilgan avtomobillarning narxi o‘zgarishsiz qoldi, kam foydalanilgan variantlari esa 0,9% ga oshdi. Tracker modelida esa narxlarning tushishi yanada sezilarli bo‘ldi, kam foydalanilganlari 1,6%, o‘rtacha foydalanilganlari 2,3%, ko‘p foydalanilganlari esa 2,9% ga pasaydi.  

Elektromobillar narxi pasayishda davom etmoqda 

Yanvar oyida BYD brendi ostidagi elektromobillarning narxi tushishda davom etdi. BYD E2 modelining yangi varianti 1,8%, o‘rtacha foydalanilgan varianti esa 2,9% ga arzonlashdi. BYD Han elektromobilining yangi versiyasi 0,9% ga tushgan bo‘lsa, ko‘p foydalanilgan variantlari 2,9% ga pasaydi.  

BYD Song Plus DM-i Champion modelining yangi versiyasi 0,3%, o‘rtacha foydalanilgan varianti 1,1%, ko‘p foydalanilgani esa 2,8% ga arzonlashdi. Shu bilan birga, BYD Song Plus EV Champion elektromobilining yangi versiyasi 1,4%, o‘rtacha foydalanilgani 3,6%, ko‘p foydalanilgan varianti esa 2,9% ga pasaydi.  

Biroq, BYD E2 va Yuan Up elektromobillarining ko‘p foydalanilgan variantlarida narx o‘zgarishsiz qoldi. Ushbu tendensiya elektromobillar bozorida narxlarning pasayishiga olib kelayotgan omillar va xaridorlar uchun yangi imkoniyatlarning paydo bo‘layotganini ko‘rsatmoqda. 

Xorijiy avtomobillar narxlari qanday shakllandi? 

Yanvar oyida xorijiy brendlarning ayrim modellari ham arzonlashdi. Elantra avtomobilining o‘rtacha foydalanilgan variantlari 2,3%, ko‘p foydalanilganlari esa 4,8% ga pasaydi. Tucson modeli bo‘yicha ham narxlarning tushishi kuzatilib, kam foydalanilgan variantlari 1,5%, o‘rtacha foydalanilganlari 0,8%, ko‘p foydalanilganlari esa 2% ga arzonlashdi.  

Sportage modelining kam foydalanilgan avtomobillari 1,4%, o‘rtacha foydalanilgan variantlari esa 1,8% ga pasaydi. Seltos modelida esa eng ko‘p foydalanilgan mashinalar narxi 2,1% ga tushdi.