Toshkentda ilk marotaba aksilkorrupsiya sohasida Xalqaro media forum bo‘lib o‘tdi

Toshkentda Aksilkorrupsiya sohasidagi ilk Xalqaro Media Forum bo‘lib o‘tdi. Mazkur forum o‘tgan yili O‘zbekistonda bo‘lib o‘tgan Korrupsiyaga qarshi kurashish bo‘yicha yuksak xalqaro mukofot bilan taqdirlash marosimida Shavkat Mirziyoyev tomonidan ilgari surilgan tashabbus asosida o‘tkazildi.

Media forum hamkorlari

Ushbu forum Korrupsiyaga qarshi kurashish agentligi tomonidan BMT Taraqqiyot dasturi, Yevropa Ittifoqining O‘zbekistondagi delegatsiyasi hamkorlik bo‘limi, Xalqaro hamkorlik bo‘yicha Germaniya jamiyati, shuningdek, O‘zbekiston Respublikasi Tashqi ishlar vazirligi, O‘zbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligi, O‘zbekiston milliy media birlashmasi, Xalqaro press-klub bilan hamkorlikda tashkil qilindi.

Tadbirda mahalliy hamda Latviya, Singapur, Filippin, Аvstriya, shuningdek, Markaziy Osiyo mamlakatlarining yetakchi ommaviy axborot vositalari jurnalist va muharrirlari, vazirlik va idoralarning matbuot kotiblari, xalqaro ekspertlar, diplomatik korpus vakillari ishtirok etdi.

Tadbir maqsadi nima?

Forumning asosiy mavzulari so‘z erkinligini himoya qilish, ommaviy axborot vositalari, davlat organlari va nodavlat notijorat tashkilotlari o‘rtasidagi o‘zaro hamkorlikni yaxshilash, shuningdek, xalqaro hamkorlikni mustahkamlash va tajriba almashish uchun platforma yaratishdan iborat bo‘ldi.

Forumning sessiyalari

Forum turli xil mavzudagi uchta sessiyadan iborat bo‘ldi. Xususan, “Davlat organlari faoliyatida ochiqlik va oshkoralikni ta’minlashda ommaviy axborot vositalarining o‘rni” mavzusida bo‘lgan birinchi sessiyasida xorijiy va mahalliy ekspertlar, jumladan Transparency International LATVIA, O‘zaro hamkorlik va qo‘llab-quvvatlash strategiyasi markazining “Ochiq hukumat hamkorligi” ekspertlari korrupsiyaga qarshi kurashish sohasidagi islohotlarni muhokama qilishdi.

“Axborot etikasi: zamonaviy ommaviy axborot vositalarining muammolari va yechimlari” sessiyasida tadbir ishtirokchilari ommaviy axborot vositalarida korrupsiya holatlarini aniqlashning muvaffaqiyatli strategiyalari, korrupsiyaga qarshi jurnalistika etikasi va standartlari, huquq va majburiyatlari to‘g‘risida soha vakillarining xabardorligini oshirish bo‘yicha fikr va tajribalari bilan o‘rtoqlashdi.

Uchinchi sessiyada esa ishtirokchilar tahliliy jurnalistika istiqbollari va jurnalistik surishtiruvlarning ahamiyatiga oid dolzarb masalalarda muhokamasiga hukumat va keng jamoatchilik e’tiborini qaratdi.

Antikorrupsiya tashkilotlarida OAV vakillarining ulushi

Bugun O‘zbekistonda jurnalist va blogerlar turli yo‘nalish va usullar orqali mamlakatimizda korrupsiyaga qarshi siyosatni amalga oshirishga faol hissa qo‘shmoqda. Korrupsiyaga qarshi kurashish milliy kengashi a’zolarining 12 foizi, Korrupsiyaga qarshi kurashish bo‘yicha viloyat kengashi a’zolarining 14 foizi, Korrupsiyaga qarshi kurashish agentligi huzuridagi Jamoatchilik kengashi a’zolarining 20 foizi ommaviy axborot vositalari vakillari va blogerlardir.

Shuningdek, korrupsiya holatlarini samarali aniqlash va oldini olish maqsadida Korrupsiyaga qarshi kurashish agentligi tomonidan jurnalistlar va blogerlar klubi tashkil etilib, buning natijasida tezkor va samarali hamkorlik tizimi yaratilgan.

Media maktablarda 150 dan ortiq mahalliy jurnalist va blogerlar tahsil olmoqda

Korrupsiyaga qarshi kurashish bo‘yicha bilim va ko‘nikmalarni oshirish maqsadida o‘zbekistonlik jurnalist va blogerlar uchun media-maktablar tashkil etildi. Media maktablarida jurnalistlar va blogerlarning jurnalistik surishtiruv ishlarini olib borish salohiyatini oshirishga qaratilgan treninglar o‘tkazildi. Hozirda media maktablarida 150 dan ortiq mahalliy jurnalist va blogerlar tahsil olmoqda.

“Biz ushbu maqsadlarga erishishda ommaviy axborot vositalari vakillari, jurnalist va blogerlar, xalqaro tashkilotlar, ekspertlar, xorijiy mamlakatlar media sohasi vakillari va keng jamoatchilikni qo‘llab-quvvatlashdan manfaatdormiz va siz bilan hamkorlikni kengaytirishni doimo qo‘llab-quvvatlaymiz. Shunday ekan, ushbu Forum barchamiz uchun muhim va dolzarbdir. O‘ylaymanki, ushbu media-forum orqali biz bu muloqotni yillik an’anaga aylantiramiz”, — dedi Korrupsiyaga qarshi kurash agentligi rahbari Akmal Burxonov.

Korrupsiyaga qarshi kurashishda media muhim o‘rin tutadi

Forumda so‘zga chiqqan BMT Taraqqiyot dasturining O‘zbekistondagi doimiy vakili Akiko Fujii korrupsiyaga qarshi kurashish doirasida bunday mediaforumning tashkil etilgani katta ahamiyatga ega ekanini qayd etdi.

– Aslida korrupsiyaga qarshi kurashish global darajada ahamiyatli, - dedi A.Fujii. – Chunki shu illat tufayli mamlakatlarda rivojlanish bo‘lmay, xalqi qashshoqlikda yashashga majbur bo‘lmoqda. O‘zbekistonda ham korrupsiyaga qarshi kurashish, shu yo‘l bilan kambag‘allikni bartaraf etish bo‘yicha ko‘plab ishlar amalga oshirilmoqda va sezilarli natijalarga ham erishildi. Bu BMTning Korrupsiyaga qarshi konvensiyasi talablariga ham mos keladi. Aytib o‘tish kerakki, korrupsiyaga qarshi kurashishda media muhim o‘rin tutadi. Bu soha vakillari davlat xizmatchilarining faoliyatini kuzatib boradi, ularning adolatli ishlashiga ma’lum ma’noda ta’sir ko‘rsatadi. Chunki OAV xodimlari kuzatish bilan cheklanmay, ma’lumot to‘playdi, uni ommaga axborot sifatida tarqatadi. Ya’ni, ochiqlik asosida jamiyat korrupsiyadan tozalanadi. Demak, korrupsiyaga qarshi kurashishda media imkoniyatlarini oshirish bo‘yicha natijador hamkorlikni yanada mustahkamlash zarur.

Forum ishtirokchilari o‘rtasida axborot va tajriba almashish uchun doimiy platforma yaratiladi

Tadbir yakuni bo‘yicha jurnalistlarning korrupsiyaga qarshi kurash masalalarini keng yoritish bo‘yicha malakasini oshirish, xususan, bu boradagi jurnalistik surishtiruvni rivojlantirish, ommaviy axborot vositalarining huquqbuzarlik sifatidagi rolini kuchaytirish bo‘yicha yangicha yondashuv, tavsiya va strategiyalar ishlab chiqildi. global miqyosda korrupsiyaga qarshi kurashning asosiy vositasi.

Shuningdek, Forum ishtirokchilari o‘rtasida axborot va tajriba almashish uchun doimiy platforma yaratishga qaror qilindi.