Inhadan Numeogacha: Sardorxon Tursunxodjayevning 2000 xalqaro dasturchi orasidan Kaliforniyadagi SI kompaniyasiga tanlab olinish tarixi

2025-yil yanvarida jahon bo‘ylab e’lon qilingan yirik tanlovda 23 yoshli o‘zbekistonlik yosh muhandis Sardorxon Tursunxo‘jayev Kaliforniyadagi sun’iy intellekt (AI) yechimlari ishlab chiqaruvchi kompaniyaga 2000 dan ortiq nomzodlar ichidan saralandi. Bu — nafaqat Sardorxonning, balki O‘zbekistonning ham intellektual salohiyatini namoyon etgan hodisa bo‘ldi.

Ilk qadamlardan global loyihalargacha

Sardorxon Toshkentdagi eng nufuzli IT oliygohlaridan biri — Inha Universitetida ta’lim olgan. U yerda dasturlash va kompyuter fanlarining asosiy yo‘nalishlarini chuqur o‘rgandi. Bir necha fanlardan a’lo baholarga ega bo‘lib, tahsil olishi davomida o‘z yo‘lini nafaqat nazariy, balki amaliy jihatdan ham shakllantirdi.

“Universitet yillari men uchun katta tajriba maktabi bo‘ldi. Har kuni yangi narsa o‘rganishni o‘zimga odat qildim,” — deydi Sardorxon.

Shu davrda u sun’iy intellekt asosidagi "MohirAI" loyihasi ustida ishlagan. Bu loyiha o‘quvchilarga mos yo‘nalishlarni tahlil asosida tavsiya qiluvchi AI tizimidir. Bu uning dasturchilikdan tashqari — real muammolarni hal etishga intilishi, jamoa bilan ishlash va qiyinchiliklarni yengish tajribasini yanada mustahkamladi.

“Bu yoshligi bilan emas, fikrlashi bilan ajralib turardi”

Sardorxonning Kaliforniyadagi kompaniyaga tanlanish jarayonini eslab, uning bevosita texnik rahbari — o‘zbekistonlik mutaxassis Bekzod Qodirov shunday deydi:

“Biz dastlab minglab nomzodlarni tahlil qildik. Sardorxon suhbatlarda juda to‘g‘ri fikrlaydi, masalani chuqur anglaydi va kod ortidagi mantig‘ini juda yaxshi tushuntira oladi. U yosh bo‘lsa ham, fikrlash tarzi bilan yetuk muhandis ko‘rinishida qoladi.”

Bekzod Qodirovning o‘zi ilgari Warner Bros’da yetakchi muhandis bo‘lib ishlagan. U Sardorxonga bergan yuksak bahosini quyidagi so‘zlar bilan yakunlaydi:

“Jamoamiz ichida Sardorxon eng yosh mutaxassislardan biri. Lekin bilim va mas’uliyat borasida tajribali kadrlardan qolishmaydi. Bunday yigitlar O‘zbekiston IT kelajagining yorqin namunasidir.”

Toshkentdan turib — global xizmatda

Bugun Sardorxon o‘z faoliyatini Toshkentdan turib olib boradi, ammo uning kodlari va ishlari dunyo bo‘ylab minglab foydalanuvchilar tomonidan qo‘llanilmoqda.

Sun’iy intellekt asosida ishlab chiqilgan avtomatlashtirish vositalari, katta hajmdagi email infratuzilmasi va server tizimlarini optimallashtirish bo‘yicha u muhim loyihalarda ishtirok etmoqda.

“Har safar o‘zim yozgan kodni AQSh yoki Yevropadagi foydalanuvchilar ishlatayotganini bilish — bu menga cheksiz motivatsiya beradi. Bu degani: Toshkentda o‘tirib ham global muhandis bo‘lish mumkin,” — deydi Sardorxon.

Xulosa: yoshlar uchun ibrat

Bugungi O‘zbekiston yoshlariga Sardorxonning yo‘li shuni ko‘rsatadiki — bilim, izlanish va intizom bor joyda jahon eshiklari ochiq. U yosh dasturchilarga ham bir fikrni tavsiya qiladi:

“Qiziqishingizni yo‘qotmang, ilmlarni asta-sekin o‘rganing, intizomni saqlang. O‘zgarish o‘zingizdan boshlanadi. O‘zingiz ustida ishlasangiz, dunyo o‘zi chiqadi qarshingizga.”

Abdulloh Tursunov