АҚШнинг 20 долларлик банкноталарида афроамерикалик аёл сурати пайдо бўлиши мумкин

Бу ҳақида Оқ Уй Матбуот котиби Женнифер Псаки маълум қилди. Унинг қайд этишича, АҚШ банкноталари мамлакат тарихини ўзида акс эттириб туриши керак.

“АҚШ молия вазирлиги мамлакатнинг янги 20 долларлик пулларида афроамерикалик Гарриет Табмен суратини акс эттириш борасидаги ҳаракатларни давом эттиряпти. Биз бу жараённи тезлаштимоқчимиз”, деган Ж. Псаки.

АҚШда қулдорлик даврида туғилган Гарриет Табменнинг ўзи ҳам Мериленд плантациясида 27 ёшигача, яъни у ердан қочиб кетиб кетгунига қадар қул сифатида яшаган. Қулчиликка қарши курашлардаги фаол иштироки билан АҚШ тарихида қолган.

Гарриет Табмен сурати туширилган янги купюра намунаси 2020 йилдаёқ таклиф қилинганди. Бироқ Трам маъмурияти буни рад этган. Ўшанда Трамп унинг сурати 20$ эмас, балки 2 долларлик купюрага кўпроқ мос тушишини айтганди.

Амалдаги 20 долларлик банкнотада эса шахсий қулларига эга бўлгани учун кўп бора танқид қилинган АҚШнинг 7-президенти, Эндрю Жексоннинг сурати туширилган.