ЁЗГИ ОРОМГОҲЛАР БОЛАЛАРНИ ЧОРЛАЙДИ

7 июнь куни “Толимаржон ИЭС” АЖга қарашли “Соҳибқирон” ёзги болалар оромгоҳи ўз ишини бошлади. Биринчи мавсум доирасида станция ишчи-ходимларининг 200 нафар фарзандлари дам олиш масканига етиб келди.  

Яккабоғ туманидаги пурвиқор тоғлар бағрида жойлашган, бетакрор табиати, сўлим боғлари, тоза ҳавоси билан кишини ҳайратга солувчи оромгоҳда болаларнинг мазмунли ҳордиқ чиқаришлари учун барча шароитлар яратилган. Масканда меҳнат қилаётган мураббийлар томонидан жажжи ўғил-қизлар ўртасида турли мавзудаги зукколар беллашуви, китобхонлик кечалари, спорт мусобақалари ташкил этиш, табиат қўйнига саёҳатлар уюштириш бўйича дастур ишлаб чиқилган. 

Дастурда болалар таътил кунларини сермазмун ўтказган ҳолда жисмоний ва руҳий жиҳатдан ҳордик чиқаришларини таъминлаш, улар онгига миллий истиқлол ғояси, ватанпарварлик туйғуларини, миллий ва умуминсоний қадриятларни сингдириш орқали ҳар томонлама баркамол авлод бўлиб улғайишлари ҳамда саломатликларини янада мустаҳкамлашларига кўмаклашадиган қатор тадбирлар ва кўнгилочар томошалар ўрин олган. 

- Жамиятимиз томонидан ташкил этиладиган соғломлаштириш мавсумида минг нафар болалар ҳордиқ чиқаришади. Уларнинг қирқ нафари эса кам таъминланган оилаларнинг фарзандлари бўлади. Оромгоҳнинг очилиши байрамини болажонлар катта қувонч билан қарши олишди. Уларнинг шодон кулгулари, хурсандчиликларини кўриб, ўзимиз ҳам бир лаҳза бахтли болалигимизга қайтгандай бўлдик, - дейди “Толимаржон ИЭС” АЖ бош директори Олим Юсупов. 

Ёзги дам олиш мавсуми бошланишига бағишланган тантанали маросимда сўзга чиққанлар нурли истиқболимиз эгалари бўлган болаларга хуш кайфият, мароқли ҳордиқ чиқаришларини тилашди. Беғубор ёшлик, бахтли болаликни тараннум этувчи мусиқали байрам дастури намойиш этилди. Қувончли лаҳзаларда чор атрофга нур сочган гулхан атрофидаги бахтиёр болалар қўшиқлар куйлашиб, рақсга тушдилар.