Sovuq ob-havoda ham sport bilan shugʻullanishni kanda qilmaslik uchun nimalarni bilish kerak?

Ko‘pchilik sovuq ob-havoda mashq qilish salomatlik uchun xavfli yoki organizmga zararli deb o‘ylaydi. Ammo shifokorlar va sport mutaxassislari bu fikrga qo‘shilmaydilar. Aksincha, ularga ko‘ra, sovuq ob-havo mashg‘ulotlarni to‘xtatish uchun bahona bo‘lmasligi kerak. To‘g‘ri yondashuv va oddiy qoidalarga rioya qilinsa, qish faslidagi mashqlar nafaqat organizmga zarar yetkazmaydi, balki salomatlik uchun foydali ham bo‘ladi. Mazkur mavzuda CNN eksperti qimmatli tavsiyalar berib o‘tdi.

Har hafta qancha mashq qilish kerak?

Kattalarga har hafta kamida 150 daqiqa o‘rtacha intensivlikdagi jismoniy faoliyat bilan shug‘ullanish tavsiya etiladi. Yugurish, velosiped haydash, tennis o‘ynash kabi mashqlar bu turkumga kiradi, qish faslida esa chang‘ida uchish yoki qor ustida yurish foydali bo‘lishi mumkin. Shuningdek, qor kurish yoki uydagi og‘ir yumushlarni bajarish ham jismoniy faoliyat hisoblanadi. Ilmiy tadqiqotlar shuni ko‘rsatadiki, bu darajadagi mashqlar inson o‘lim xavfini kamaytirib, yurak-qon tomir kasalliklari va rak rivojlanishining oldini oladi.

Qayerda shugʻullangan ma’qulroq: ochiq havoda yoki ichkarida?

Kun bo‘yi beharakat o‘tirish salomatlik uchun jiddiy xavf tug‘dirishi mumkin. Shu bois, har kuni hatto 10-15 daqiqalik tez yurish kabi faoliyat bilan shug‘ullanish salomatlik uchun muhim. Shu bilan birga, dam olish kunlarida uzoqroq mashq qilish mumkin, biroq kun davomida jismoniy harakatni tashlab qo‘ymaslik kerak.

Eng yaxshi mashq bu muntazam bajariladigan mashqdir. Ayrimlar sport zalini ma’qul ko‘radi, boshqalar esa ochiq havoda mashq qilishni yaxshi ko‘rishadi. Qish faslida ochiq havoda mashq qilish mumkin, ammo xavfsizlik choralariga amal qilish muhim.

Sovuq ob-havoda mashq qilish uchun tavsiyalar

Sovuqda mashq qilishda quyidagi omillarga e’tibor berish zarur:

 1. O‘zingizni o‘rgating. Ilgari sovuqda mashq qilmagan bo‘lsangiz, asta-sekinlik bilan boshlang. Maqsadga erishguncha uyingiz yoki mashinaga yaqin bo‘ling.

 2. Ob-havoni tekshiring. Havo prognoziga qarang va shamolli kunlarda ehtiyot bo‘ling. Iloji boricha kunning iliqroq vaqtlarini tanlang.

 3. Xavflarni hisobga oling. Gipotermiya va qotib qolish xavfiga qarshi mos kiyimlar tanlang. Qavat-qavat kiyinish va texnik materiallardan tayyorlangan kiyimlar kiyish tavsiya etiladi.

 4. Suv iching. Sovuqdagi mashqlar ham suvga ehtiyoj tug‘diradi. Mashq oldidan suv iching va agar uzoq vaqt davomida faoliyat bilan shug‘ullansangiz, suv yoki elektrolit ichimlik olib yuring. Elektrolit ichimlik — bu organizmda suv va mineral moddalar muvozanatini saqlashga yordam beradigan ichimlik. U asosan tuzlar, minerallar (natriy, kaliy, magniy, kalsiy) va ba’zida uglevodlarni o‘z ichiga oladi.

 5. Rejangizni boshqalarga aytib qo‘ying. Agar yolg‘iz chiqsangiz, qayerda bo‘lishingizni yaqinlaringizga xabar qiling. Bu xavfli vaziyatlarda o‘z vaqtida yordam chaqirish uchun zarur.

Qachon yopiq joyda mashq qilish yaxshiroq?

Yopiq joyda (uy ichida, sport zallarida) mashq qilish ayrim vaziyatlarda qulayroq bo‘lishi mumkin. Qor yomg‘ir yoki muzli yo‘llarda ochiq havoda faoliyat xavfli bo‘lishi mumkin. Har kim o‘zini qulay his qiluvchi joyni tanlashi lozim. Shuningdek, sovuq ob-havo sharoitiga mos ravishda hudud tanlash va salomatlik holatini inobatga olish muhim.

Jismoniy mashg‘ulotlar faslga bog‘liq emas. Muhimi, uni muntazam va xavfsiz bajarishdir.