Ingliz tili o‘qituvchisidan xalqaro kompaniyaning savdo menejerligigacha – Azizjon Jumaboyevning muvaffaqiyat yo‘li yoshlarga motivatsiya ulashmoqda

“...O‘z oldinga qo‘ygan maqsadingdan qaytma, hayoting hali oldinda. Sendan umidimiz katta”. Otamni yo‘qotganimda onamdan eshitgan gapim shu bo‘ldi. Hayotimdagi eng muhim pallada hech kim menga bundan ortiq dalda bera olmasligini bilardim. Shuning uchun mas’uliyatni his qilib, o‘zimni qo‘lga olishdan boshqa choram ham yo‘q edi. Men uchun burilish nuqtasi aynan shu yerdan boshlandi desam yanglishmagan bo‘laman”.

"Norvale Company Limited" kompaniyasining O‘zbekistondagi vakolatxonasida savdo menejeri sifatida ishlab yurganida Azizjonga bungacha to‘plagan shaxsiy tajribalari qo‘l keldi. Kompaniyaning asosiy faoliyati Germaniyaning “KARL STORZ GmbH & Co., KG” korporatsiyasi tomonidan ishlab chiqarilgan tibbiy asbob-uskunalar yetkazib berishdan iborat bo‘lib, bu yerda u:

–           xaridorlar bilan shartnomalar tuzish va imzolash;

–           imzolangan shartnomalar monitoringi;

–           yuk tashish hujjatlarini tayyorlash;

–           tender xaridlarida ishtirok etish uchun hujjatlarni tayyorlash va rasmiylashtirish;

–           qabul qilish, o‘rnatish va o‘qitish dalolatnomalarini tayyorlash va imzolash;

–           Dori vositalari, tibbiy buyumlar va tibbiy texnika ekspertizasi va standartlashtirish davlat markazida tibbiy texnikani ro‘yxatdan o‘tkazish va sertifikatlash kabi vazifalarni bajarardi.

Hammasi nimadan boshlandi?

Toshkent shahrida oddiy ishchi oilasida tavallud topgan Azizjonning bolalik yillari bir qarashda ko‘pchilik qatori oddiy o‘tdi. O‘zi yashaydigan Yunusobod tumanida tengqurlari bilan to‘p tepib katta bo‘ldi. Avvaliga futbol, keyinchalik boks va kikboks bilan shug‘ullanib, 2010-yilda kikboks bo‘yicha Toshkentda o‘tgan chempionatda oltin medalni qo‘lga kiritdi.

Azizjon, maktabda ham faol o‘quvchilardan edi. Davlat tadbirlari va fan olimpiadalarida faol qatnashardi. Bir safar fizika fanidan tuman olimpiadasida o‘zi o‘qiydigan maktab sharafini himoya qilib, faxrli 1-o‘rinni egallagan, yilning eng iqtidorli o‘quvchisi sifatida e’tirof qilingan.

Maktabni a’lo baholar bilan yakunlagach 2007-yilda Toshkent axborot texnologiyalari instituti qoshidagi akademik litseyiga qabul qilindi. Bu yerda ham “tinch o‘tirmadi”, litsey tadbirlarida faol qatnashib keldi, yangi do‘stlar orttirdi. Oldinda uni keyingi marra, oliy o‘quv yurti talabasi bo‘lish sari mashaqqatli yo‘l kutib turardi.

Ko‘pdan buyon o‘zi niyat qilib yurgan Toshkent Axborot Texnologiyalari Universitetiga hujjat topshirdi. Ketma-ket 2 yil davomida imtihonlardan o‘ta olmaganida ham tushkunlikka tushib qolmadi. Azizjon hayotda hamma narsa ham rejadagidek ketmasligini to‘g‘ri qabul qilib, o‘zi uchun yangi rejalar tuza boshladi. 2011-yilda u tanlagan sohasini o‘zgartirishga qaror qildi. Do‘stining taklifi bilan ingliz tilini chuqur o‘rganishni boshladi. U chet tilini puxta o‘rganish o‘z kelajagi uchun muhim ekanligini allaqachon tushunib yetgandi va bu eng to‘g‘ri qaror bo‘lib chiqdi.

“Yomon an’anaga chek qo‘yildi, endi tog‘ni talqon qilaman!”

Oradan bir yil o‘tib, nihoyat talabalik maqomiga erishdi. Toshkentdagi Singapur Menejmentni rivojlantirish Institutiga o‘qishga qabul qilindi. Bu yerda unga abituriyentlik davrida to‘plagan bilim va tajribalari qo‘l keldi. O‘qishdan bo‘sh vaqtlarida turli o‘quv markazlarida ingliz tilidan dars berar, shu bahona o‘z bilimlarini yanada mustahkamlab borardi:

“...Ishonasizmi?! O‘qishga kirganimni bilgach, yelkamdan tog‘ ag‘darilgandek bo‘ldi. Ota-onam, yaqinlarim oldida yuzim yorug‘ bo‘lganidan nihoyatda baxtiyor edim, axiyri ularning ishonchini oqladim. Ikki yillik muvaffaqiyatsizlikdan keyin, yomon an’anaga chek qo‘ydim va endi g‘ayratim yanada oshib, tog‘ni talqon qilishga-da tayyor edim. Hayotimdagi ilk katta motivatsiyani aynan shu kuni olganman”.

 Endi Azizjon uchun imkonsiz ishning o‘zi yo‘qdek tuyulardi. Shogirdlariga ingliz tilidan dars berarkan, ularga o‘z tajribalarini misol qilib ko‘rsatar, hech qachon taslim bo‘lmaslikni, harakat qilinsa, yakunda albatta natija bo‘lishini qat’iy uqtirar edi.

“Karyeramni davlat korxonasida boshlaganim men uchun muhim tajriba bo‘ldi”

2016-yilda institutni tamomlagan Azizjon O‘zbekiston Respublikasi Sog‘liqni saqlash vazirligi huzuridagi “O‘zmedeksport” Respublika tashqi iqtisodiy davlat korxonasida ilk professional faoliyatini boshladi. Bu yerda u ikki yil davomida tashqi iqtisodiy aloqalar bo‘yicha menejer lavozimida samarali mehnat qildi:

“...Karyeramni davlat korxonasida boshlaganim yaxshi bo‘ldi. Sababi bu yerda ko‘p narsa o‘rgandim, menejer sifatida yangi qirralarimni kashf qildim. “O‘zmedeksport”’da asosiy vazifam tenderlarni tashkil qilish va o‘tkazish, tenderda g‘olib bo‘lgan korxonalarning tibbiy uskunalarni import qilishidan tortib, tegishli tibbiyot muassasasiga yetib borgunigacha bo‘lgan jarayonda ishtirok etish va nazorat qilishdan iborat edi. To‘plagan tajribalarim kelgusi faoliyatimda menga katta yordam berdi”, deya eslaydi Azizjon Jumaboyev.

Uning yangi bilimlarni tez o‘zlashtirishi, hamkasblari bilan hamjihatlikda ishlashdagi muvaffaqiyati, chuqur tahliliy va tezkor fikrlash qobiliyati o‘zi egallab turgan lavozim uchun eng munosib nomzod sifatida namoyon bo‘lishini ta’minladi. Bu hali boshlanishi edi. Oldinda uni yangi marralar kutib turardi. Tez orada unga xalqaro kompaniyadan ishga taklif kelib tushdi va u bu imkoniyatdan unumli foydalandi.

“Olmonlar bilan ishlaganimda ulardagi punktuallik menga ko‘proq yoqqan”

“Germaniyaning “Norvale Company Limited” kompaniyasidan ishga taklif olganimda o‘ylab o‘tirmay rozi bo‘ldim. Sababi xalqaro miqyosdagi mutaxassisga aylanish uchun chel el kompaniyalarida ham tajrib to‘plashim zarurligini tushunardim. Bu yerda savdo menejeri sifatida ishlab yurganimda ulardagi punktuallik, tartib-intizom menga yoqqan. Sababi o‘zimning ham xarakterim shunaqa. Kompaniyamiz Germaniyada ishlab chiqarilgan tibbiy asbob-uskinalarni O‘zbekistonga import qilish, yetkazib berish va o‘rnatish bilan shug‘ullanardi. Avvalgi ish joyimda ham deyarli shunga o‘xshash vazifani bajarganim uchun u qadar qiyinchilikka duch kelmadim. Aksincha, bor tajribamni yanada boyitib bordim”.

Navbat okeanortiga

Azizjon erishgan yutuqlari bilan bir joyda to‘xtab qolgani yo‘q. Navbatdagi maqsadi xorijda magistrlik rutbasiga erishish va xalqaro toifadagi yetuk mutaxassis bo‘lib yetishish. Hozirda u Qo‘shma Shtatlarda tahsilni davom ettirish imkoniyatlarini ko‘rib chiqmoqda. Uning yangi rejalari avvalgilari kabi muvaffaqiyatli amalga oshishini tilab qolamiz.

Darvoqe, Azizjonning o‘zi ham ahdida qat’iy ekanini ta’kidlar ekan, ayni paytda bu unga mas’uliyat ham yuklashini yashirib o‘tirmadi:

“O‘zbekistonda mendan yosh shogirdlarim, ukalarim bor. Bu menga alohida mas’uliyat yuklaydi. Ular uchun ham buni uddalashim, ularga o‘rnak bo‘lishim kerak. Menga qarab ular ham, mana harakat qilsa natijaga erishsa bo‘lar ekan, degan xulosaga kelishlarini xohlayman. Hech bo‘lmasa shu yo‘l bilan ularga motivatsiya ulashsam deyman”.