ИСТИҚЛОЛ БАЙРАМИГА МУНОСИБ ТУҲФА ТОПШИРИЛДИ

“Иссиқлик электр станциялари” акциядорлик жамияти ҳамда “Тахиатош ИЭС” АЖнинг ҳомийлик маблағлари ҳисобидан Қорақалпоғистон Республикасининг Шуманай туманида янги ахборот-кутубхона маркази ишга туширилди. 

Янгидан барпо этилган Ахборот-кутубхона марказининг очилиш маросими Мустақиллигимизнинг 31 йиллик шодиёналари олдидан бўлиб ўтди. 

Унда, Шуманай тумани ҳокими Баҳодир Янгибоев, “Тахиатош ИЭС” АЖ бош директори Фахриддин Халилаев, туман сектор раҳбарлари ҳамда вилоят кенг жамоатчилиги, фахрийлари иштирок этишди.

Таъкидлаш керакки, бундай шароитдаги ахборот – кутубхона маркази фаолиятини ташкил этиш истиқболи Давлатимиз раҳбари томонидан илгари сурилган “Инсон қадри учун” ғоясини ҳаётга татбиқ этиш ҳамда 2022 йил 23-24 февраль кунлари Қорақалпоғистон Республикасига ташрифлари чоғида белгилаб берилган эди.

Ушбу барча қулайликларга эга янги ахборот-кутубхона маркази “Иссиқлик электр станциялари” акциядорлик жамияти ҳамда “Тахиатош ИЭС” АЖнинг ҳомийлик маблағлари ҳисобидан тўлиқ қуриб битказилди ва фойдаланишга топширилди.

Ҳозирда ахборот кутубхона марказида умумий ҳисобда 2 та ўқув ва 1 та электрон ўқув заллари китобхонлар хизматига тайёр.

Мазкур кутубхонадан беш мингдан ортиқ китоб – жаҳон, мумтоз ва болалар адабиёти жой олган. Шунингдек, янги, замонавий кутубхонада 10 дона компьютерлар жамланмаси ҳам шу ҳудуд аҳолиси, ёшлари учун хизмат қилади.