“ИНСОН ҚАДРИ УЧУН” ТАМОЙИЛИ АСОСИДА АМАЛИЙ ИШЛАР БАЖАРИЛМОҚДА

“Иссиқлик электр станциялари” АЖ Президентимиз томонидан илгари сурилган “Инсон қадри учун” ғояси ижросини таъминлаш борасида кенг кўламли саъйи-ҳаракатларни олиб бормоқда. Жумладан, “Тахиатош ИЭС” АЖ Тахиатош туманидаги аҳолининг турмуш фаровонлигини таъминлашга қаратилган қатор ижтимоий лойиҳаларда фаол қатнашмоқда. 

Электр станция томонидан “маҳаллабай” ишлаш тизимини кенг йўлга қўйиш, “Темир дафтар”га киритилган аҳолига моддий ва маънавий кўмак кўрсатиш, аҳолининг “Аёллар дафтари” ва “Ёшлар дафтари”дан ўрин олган қисми билан доимий ишлаш орқали уларни у ёки бу касбга тайёрлаш ва қайта тайёрлаш, ўз бизнесларини йўлга қўйишга кўмаклашиш ҳамда шу орқали уларнинг бандлигини таъминлаш борасида муҳим вазифалар бажарилмоқда. Фуқароларнинг мурожаатларини жойига чиққан ҳолда ўрганиш ва ҳал этиш бўйича аниқ манзилли чора-тадбирлар амалга ошириляпти. 

- Маълумки, давлатимиз раҳбари томонидан мамлакатимизда туб ислоҳотлар олиб бориляпти. Улар инсонлар ҳаётига ижобий таъсир этаётгани қувонарли ҳол албатта. Бироқ ҳали ечимини кутаётган масалалар, бажаришимиз лозим бўлган ишлар талайгина. Шундай экан биз жойларда юртдошларимизни ўйлантираётган масалаларни ўрганиш, у ёки бу ҳужжатнинг ижросини назорат қилишда фаоллик кўрсатишимиз лозим, - дейди “Тахиатош ИЭС” АЖ Бош директори Фахриддин Халилаев.

Корхона томонидан шунингдек, туманни ижтимоий-иқтисодий ривожлантириш, инвестиция лойиҳалари ва давлат дастурларини амалга ошириш, аҳолига ижтимоий хизмат кўрсатиш тизимини такомиллаштириш ҳамда ҳудуд инфратузилмасини яхшилаш борасида ҳам кўзга кўринарли ишлар бажариляпти.  

Куни кеча, фуқароларнинг мурожаатларини ўрганиш, ижтимоий дастурлар ижроси ва мавжуд муаммоларни жойида бартараф этиш бўйича олиб борилаётган тегишли вазифалар ижросини ўрганиш мақсадида Қорақлпоғистон Республикасига ташриф буюрган Ўзбекистон Республикаси Олий Мажлиси Сенати ва Қонунчилик палатаси аъзолари “Тахиатош ИЭС” АЖ юқорида кўрсатилган вазифалар ижроси билан танишишди.