22 ноябр 2013, 11:06 1734 кўрилди

21 ноябрь куни Латвия пойтахти Рига шаҳридаги "Максима" супермаркетининг томи ва девори қулаб тушган. Приедайнес кўчасида жойлашган ушбу дўконнинг бузилган қисми 500 квадрат метрни ташкил қилади ва ҳалокат вақтида бу ерда камида 70дан ортиқ кишининг бўлгани тахмин қилинмоқда.  

Вайроналар остида қолиб кетган одамларни қутқариб олиш учун 400дан ортиқ қутқарувчи жалб қилинди. Ҳозирга қадар 40 киши жароҳат билан касалхонага ётқизилган. 26 кишининг ҳалок бўлгани аниқланди, уларнинг 3 нафари қутқарувчилардир. Дастлаб касса ва мева-сабзавот бўлими устидаги том қулаган, бу ерда қутқарувчилар иш олиб бораётганда эса уларнинг устига девор ҳам қулаб тушган. Мутахассислар супермаркетнинг бошқа қисмларида ҳам яна ҳалокат содир бўлиши эҳтимоли борлигини айтишмоқда. 

Охирги маълумотларга кўра, қутқарувчилар вайроналар остидаги одамларни эшитиш учун қидирув техникаларини маълум муддатга ўчириб қўйишган. Шунингдек, бино тагида қолиб кетганларга уяли телефон орқали қўнғироқ қилишга уриниб кўришмоқда. Латвия ИИВ вакилининг сўзларига кўра, бир нечта нуқтадан телефон овози эшитилган. 

^{фото: Риа Новости}