Сервер Жепаров: "Гуруҳдаги энг кучли рақибни мағлубиятга учратиш имкониятига ишонамиз"
12 июн 2017, 08:31 3462 кўрилди

alt

Хабарингиз бор, бугун, 12 июнь куни Ўзбекистон миллий терма жамоаси ЖЧ-2018 саралаши доирасида Теҳронда Эронга қарши учрашув ўтказади.

Ўзбекистон терма жамоаси ярим ҳимоячиси, Осиёнинг икки карра энг яхши футболчиси Сервер Жепаров ушбу ўйин олдидан ОФК расмий сайтига интервью берди, деб хабар қилади ЎФФ матбуот хизмати.

“Барчаси жуда оддий – биз саралаш босқичидаги қолган уч ўйинда ғалаба қозонишимиз керак, ўшанда плей-офф босқичида ўйнамаймиз ва Жаҳон чемпионатига автоматик равишда йўл оламиз. Сўнгги 8 йил давомида, айниқса, бундан аввалги саралаш босқичида кучли таркиб билан ҳаракат қилдик. Бу мен ўйнаган энг кучли авлод эди”, – деди Жепаров.

Сервер Жепаров 34 ёшида ЖЧ–2018 мусобақасига чиқиш орқали мамлакат қаҳрамони бўлиш истаги ҳақида ҳам сўзлади.

“Ғалаба қозониш нафақат мен учун, балки Ўзбекистон аҳолиси учун мотивация бўларди. Чунки мамлакат термаси Жаҳон чемпионатида иштирок этмаган. 34 ёшимда ЖЧ–2018 турнирига йўл олиб, мамлакат қаҳрамонига айланишни хоҳлардим”, – деди ярим ҳимоячи. 

Тажрибали ярим ҳимоячи Ўзбекистон термаси ЖЧ–2014 турнирига чиқишга жуда яқин келгани ва қўлдан бой берилган имкониятдан кейин кетиш ҳақида ўйлаганини айтиб ўтди.

“Биз яхши ўйнаган эдик ва ЖЧ–2014 турнирига чиқиш учун битта гол камлик қилганди. Бундан афсусда эдик. Жанубий Корея термаси Эронга мағлуб бўлганини эшитгач, қўлдан бой берилган барча имкониятлардан афсусга тушгандик. Мен термадан кетишни ва умуман футбол кўрмасликни истагандим”, – деб эслади Сервер Жепаров.

Эрон ЖЧ–2018 саралаш босқичида 7 та ўйин ўтказиб, 5 та ғалаба ва 2 та дуранг қайд этди. Карлуш Кейруш шогирдлари бирорта ҳам ўйинда гол ўтказиб юбормади. Шунга қарамай, Сервер Жепаров эртанги ўйин олдидан ижобий кайфиятда эканини айтди. Чунки Ўзбекистон 2012 йили Теҳронда Эронни мағлубиятга учратишга муваффақ бўлганди.

“Исталган жамоа билан ўйнай олишимиз бизга ишонч беради, ҳатто сафар ўйинларида ҳам. Биз гуруҳдаги энг кучли рақибни мағлубиятга учратиш имкониятига ишонамиз ва айнан шу нарса бизда ишонч туғдиради. Рақибни мағлубиятга учратиш учун 100%, ҳатто 120% кучимизни беришимиз керак бўлади. Барча 11 футболчи бир жамоа бўлиб ўйнаши талаб қилинади”, – дейди ўзбекистонлик футболчи.

UZ24: Хабар ва янгиликларни Facebook ҳамда Telegram'да ҳам кузатиб боринг

Шархлар
Реклама