Buxoroda erkak oʻz sinfdoshini oʻldirgani maʼlum boʻldi

Buxoro viloyati Ichki ishlar boshqarmasining xabar berishicha, Buxoro viloyatining Kogon tumanida bedarak yo‘qolgan erkak sinfdoshi tomonidan o‘ldirilgani aniqlandi.

Marhum uyidan chiqib ketgan

Joriy yilning 15-yanvar kuni Buxoro viloyati Kogon tumanining Bahovuddin Naqshband mahallasida yashovchi fuqaro tuman prokuraturasiga ariza bilan murojaat qilib, akasi X.A. 7-yanvar kuni taxminan soat 19:30 larda yashash uyidan noma’lum tomonga chiqib ketib qaytib kelmaganligini bildirgan.

Jinoyat ishi qoʻzgʻatildi

Mazkur holatga aniqlik kiritish maqsadida tezkor tergov guruhi tuzilib, kechiktirib bo‘lmas tezkor surishtiruv harakatlari olib borildi. O‘tkazilgan tergovga qadar tekshiruv harakatlari davomida huquq-tartibot organlarida bu voqelikda qotillik alomatlari mavjud degan taxmin paydo bo‘ladi. Shu sababli Kogon tumani prokuraturasi tomonidan 20-yanvar kuni holat yuzasidan O‘zbekiston Respublikasi Jinoyat Kodeksining 97-moddasi (Qasddan odam o‘ldirish) 1-qismi bilan jinoyat ishi qo‘zg‘atilib, dastlabki tergov harakatlari ham boshlab yuborildi.

7-yanvardan 24-yanvarga qadar surishtiruv olib borildi

7-yanvardan 24-yanvar kuniga qadar bo‘lgan vaqt mobaynida bedarak yo‘qolgan fuqaroni topish maqsadida viloyat hamda tuman prokuraturasi, ichki ishlar boshqarmasi va hududiy ichki ishlar organlari, Favqulotda vaziyatlar boshqarmasi va boshqa taalluqli idoralarning xodimlaridan iborat tezkor-tergov guruhlari tomonidan bir qator tezkor surishtiruv, qidiruv hamda tergov harakatlari olib borildi.

Qotillik deya taxmin qilinayotgan holatga aloqador ashyoviy dalillarni topish maqsadida jinoyat sodir qilingan joyga yaqin hududlardan o‘tgan zovur (zaxkash), ariq va kanal suvlari to‘silib, suvi to‘xtatilib tozalandi, qarovsiz bino va inshootlar, qurilishi tugallanmagan ob’ektlar va ularning yon atroflari ko‘zdan kechirildi.

Barcha qarindosh-urug‘, qo‘ni-qo‘shni, tanish-bilishlar, muqaddam ushbu turdagi yoki shunga o‘xshash jinoyatlarni sodir qilgan yoki sodir etishga moyil deya ichki ishlar organlari, shuningdek, tibbiyot muassasalarining maxsus hisobida turuvchi shaxslar o‘rtasida tezkor profilaktik, surishtiruv hamda tergov harakatlari olib borildi.

Qotil topildi

Qidiruv surishtiruv ishlarining 17-kunida Buxoro viloyati Ichki ishlar boshqarmasi Tezkor qidiruv xizmati va Kogon tumani Ichki ishlar bo‘limi xodimlari tomonidan olib borilgan tezkor-qidiruv tadbirlari natijasida, ushbu holatda haqiqatdan ham qotillik jinoyati sodir etilganligi o‘z tasdig‘ini topdi. Jinoyatni sodir qilgan gumondor shaxs ham aniqlandi.

Qotil marhumning yon qoʻshnisi va sinfdoshi boʻlgan

Ushbu qotillikni sodir qilgan shaxs bir necha marotaba sudlangan, jabrlanuvchining yon qo‘shnisi, bir maktabda o‘qigan sinfdosh do‘sti bo‘lga. Qotil spirtli ichimlik ta’sirida o‘zaro kelib chiqqan kelishmovchilik oqibatida o‘z do‘stini urib, do‘pposlashi oqibatida umriga zomin bo‘lgan.

Ayblanuvchining aybi uning ko‘rsatmalarini voqea joyida tekshirish tergov harakati hamda guvohlarning ko‘rsatmalariga asosan to‘liq isbotlanib, jinoyat ishi yuzasidan to‘plangan hujjatlar jazoning muqarrarligini ta’minlash uchun Jinoyat ishlari bo‘yicha Kogon tuman sudiga yuborilgan.