16 апрел 2018, 15:33 672 кўрилди

 

Ўзбекистон Президентининг “Адлия вазирлиги фаолиятини янада такомиллаштиришга доир ташкилий чора-тадбирлар тўғрисида”ги қарори қабул қилинди. Бу ҳақда вазирликнинг матбуот хизмати хабар беради.

Ҳужжатга мувофиқ, 2018/2019 ўқув йилидан бошлаб ТДЮУ магистратурасига тўлов-контракт асосида талабаларни қабул қилиш квотаси 150 нафар одамгача оширилади.

2018/2019 ўқув йилидан бошлаб Тошкент давлат юридик университетининг магистратурасига қабул тест синовларсиз, ўқитиш муддати давомийлигини бир йил қилган ҳолда амалга оширилади.

ТДЮУнинг бошқарув ходимлари, профессор-ўқитувчиларни, илмий, ўқув-ёрдамчи, техник ва хизмат кўрсатувчи ходимларига моддий рағбатлантириш махсус жамғармаси ҳисобидан ўрнатиладиган ҳар ойлик устамалар миқдори икки бараварга оширилади.

Қарор билан педагог кадрларни қайта тайёрлаш ва малакасини ошириш тармоқ маркази негизида ТДЮУ ҳузурида Халқаро стандартлар бўйича юридик кадрларни касб-ҳунарга ўқитиш марказини ташкил этиш белгиланган.

UZ24: Хабар ва янгиликларни Telegram'да ҳам кузатиб боринг