Ўқитувчи ва икки талаба ўқишга киритиб қўйиш эвазига пора олаётганда ушланди

окт 06 / 2018

– Улар Тошкент автомобиль йўллари коллежига ўқишга киритиб қўйиш эвазига 3000 доллар таълаб қилган

– Ҳозирда тергов ҳаракатлари олиб борилмоқда

alt

ИИВ Жиноят қидирув бош бошқармаси Коррупция ва иқтисодий жиноятларга қарши курашиш бошқармаси тақдим этган хабарга кўра, жорий йилнинг 24 сентябрь куни фуқаро Ч.Н. Ички ишлар вазирлигига ариза билан мурожаат қилиб, унда Тошкент давлат юридик университети талабаси “Р” исмли шахс ва ўзини Меҳнат вазирлигининг юқори лавозимида ишловчи раҳбар ходими деб таништирган “Х” исмли шахс унинг икки танишини Олий ва ўрта махсус таълим вазирлигининг раҳбарлари орқали Тошкент автомобиль йўллари коллежига ўқишга киритиб қўйиш эвазига 3000 АҚШ доллари миқдоридаги пулларни беришини таълаб қилаётганликларини маълум қилган. Бу ҳақда ИИВ Жамоатчилик ва оммавий ахборот воситалари билан алоқалар бошқармаси матбуот хизмати ахборот бермоқда.

Ариза асосида, шу куни ИИВ тезкор ходимлари томонидан Юнусобод туманида ўтказилган тадбир давомида, Тошкент давлат юридик университетининг 4-босқич талабаси Ж.Р. ариза муаллифи Ч.Н.дан 3000 АҚШ доллари миқдоридаги пулларни олган вақтида ашёвий далиллар билан ушланди. Ж.Р. ушбу пуллардан 1000 АҚШ долларини ўзига улуш сифатида олиб қолиб, қолган 2000 АҚШ долларини ўқишга жойлаштириш масаласини ҳал этиш учун “Х” исмли шеригига бериши лозим бўлганлигини кўрсатганлиги сабабли тезкор тадбир давом эттирилди. Натижада 27 сентябрь куни Ўзбекистон Республикаси Миллий университетининг 2-босқич талабаси Х.Х. ҳамда ушбу университетининг Ижтимоий фанлар факультети катта ўқитувчиси лавозимида ишловчи Х.С.лар 2000 АҚШ доллари миқдоридаги пулларни олган вақтларида ашёвий далиллар билан ушланди.

Ушбу ҳолат юзасидан ИИВ ҳузуридаги Тергов департаменти томонидан фуқаролар Ж.Р., Х.Х. ва Х.С.ларга нисбатан ЖКнинг тегишли моддалари билан жиноят иши қўзғатилиб, эҳтиёт чораси тариқасида қамоққа олинган.

Ҳозирда тергов ҳаракатлари олиб борилмоқда.

UZ24: Хабар ва янгиликларни FacebookTwitterTelegram'да ҳам кузатиб боринг

 

Электрон манзилингиз кўрсатилмайди. Белгиланган майдонлар тўлдирилиши шарт *